Í byrjun árs 2023 var glæsilegt einbýlishús við Keldugötu í Urriðaholti í Garðabæ sett á sölu. Húsið er 324 fm að stærð og var reist 2012. Nú hefur húsið verið selt á 238 milljónir.
Þetta einstaka hús býr yfir miklum sjarma en það er á tveimur hæðum og státar af fimm svefnherbergjum og þremur baðherbergjum.
Eldhús, stofa og borðstofa eru samliggjandi í björtu og rúmgóðu alrými með mikilli lofthæð og síðum gluggum. Sérsmíðaðar innréttingar úr brúnbæsaðri eik prýða eignina, þar á meðal eldhúsið sem er með góðu skápa- og vinnuplássi. Á borðum og á eyju má svo sjá terrazzo-stein sem tónar vel við gólfið, en í eigninni má annars vegar sjá terrazzo-steypu á gólfi og hins vegar gegnheila brúnbæsaða eik.
Frá alrýminu er heillandi útsýni yfir náttúruna í kring, meðal annars yfir Vífilsstaðarvatn, golfvöllinn í Setbergi og upp í Heiðmörk. Fallegir húsmunir eru einkennandi í rýminu, en þar að auki býr gasarinn í stofu til afar notalega stemningu.
Gengið er niður á neðri hæðina um steyptan stiga með terrazzo-þrepum. Á neðri hæðinni má meðal annars finna lúxus hjónasvítu með fataherbergi og baðherbergi.
Nýjir eigendur eru mæðgurnar Margrét Albertsdóttir og Svanhvít Daðey Pálsdóttir. Þær keyptu húsið af Hákoni Bergmann Óttarssyni og Þórdísi Hörpu Lárusdóttur.
Smartland óskar mæðgunum til hamingju með húsið!