Við Eikjuvog í Reykjavík er að finna skemmtilega skipulagt einbýlishús í funkís stíl sem Kjartan Sveinsson arkitekt teiknaði. Húsið telur 195 fm og var reist árið 1967, en það hefur hlotið þó nokkrar endurbætur á síðustu árum.

Eldhús og borðstofa eru samliggjandi í opnu og björtu rými með mikilli lofthæð. Fallegur þakgluggi gefur rýminu fallega birtu og skapar skemmtilega stemningu. Eldhúsið er rúmgott með stílhreinni dökkri innréttingu og góðu skápa- og vinnuplássi.

Frá eldhúsrýminu er gengið inn í tvær samliggjandi stofur. Í annarri þeirra má sjá flottan arinn með Drápuhlíðargrjóti sem setur svip sinn á rýmið. Frá stofu er útgengt á verönd til suðurs með palli, en í kringum húsið er stór og gróin lóð. 

Eignin státar af fjórum svefnherbergjum og tveimur baðherbergjum. Ásett verð er 159.000.000 krónur. 

Sjá á fasteignavef mbl.is: Eikjuvogur 5