Við Bryggjugötu 4 í Reykjavík er að finna einstaka 198 fm íbúð á fimmtu hæð. Íbúðin er í eigu félagsins Novator F11 ehf. sem er í eigu Björgólfs Thors Björgólfssonar viðskiptamanns. Félagið keypti íbúðina 20. apríl 2022. Fasteignamat íbúðarinnar er 267.800.000 kr. 

Íbúðirnar við Bryggjugötu státa af miklum lúxus en þessi er þó allt öðruvísi en aðrar íbúðir hússins þótt grunninnréttingar séu notaðar. 

Allar innréttingar í íbúðinni eru sérsmíðaðar úr amerískri hnotu af ítalska handverkshúsinu Gili Creations. Þar að segja eldhúsinnréttingar, baðinnréttingar og fataskápar. Kvarts borðplata er í eldhúsi og eldhúseyjan er klædd marmaraflísum.

Eldhús og stofa tengjast á heillandi hátt og er búið að klæða veggi með sérstökum veggklæðningum. 

Selma Ágústsdóttir innanhússarkitekt hannaði íbúðina að innan og er stíllinn mjög í hennar anda. Grænn sófi í stofunni fer vel við klædda veggina, lampa, púða og listaverk. 

Dekkri veggklæðningar er að finna í forstofu og í borðstofu. 

Sjá nánar á fasteignavef mbl.is: Bryggjugata 4