Inga Sæland keypti tvær fasteignir með stuttu millibili

Það gustar af Ingu Sæland félags-og húsnæðismálaráðherra og formanni Flokks fólksins. Hún hefur verið talsmaður þeirra sem minna mega sín í landinu og negldi sig inn í ríkisstjórn með slagorðinu; fæði, klæði og húsnæði. 

Inga veit að það skiptir máli að eiga þak yfir höfuðið og þekkir það af eigin raun hvað það er glatað að vera á leigumarkaði. Síðustu ár hefur Inga fjárfest í fermetrum og á í dag tvær fasteignir sem eru samtals 328 fm að stærð. 

Hér má sjá húsið við Hlíðarveg á Ólafsfirði. Inga festi kaup á húsinu 2018 en afsalið fór ekki fram fyrr en tveimur árum síðar.

Keypti einbýli 

Inga er ættuð frá Ólafsfirði og því er kannski ekki skrýtið að hún hafi fest kaup á einbýlishúsi í bæjarfélaginu. Samkvæmt fasteignamati ríkisins festi Inga kaup á húsinu 27. ágúst 2018 en afsalið á húsinu var ekki gefið út fyrr en tveimur árum seinna eða 23. nóvember 2020. Inga greiddi 12.000.000 kr. fyrir húsið en það keypti hún af Birki Inga Símonarsyni. Húsið er 180,9 fm að stærð og var það reist 1968. Það skartar stórum gluggum og byggt í þeim stíl sem var móðins á byggingarárinu. 

Í dag er sonur Ingu og Óla Más Guðmundssonar, Guðmundur Ólason, með lögheimili í húsinu ásamt eiginkonu sinni, Andreu K. Lind Gunnarsdóttur athafnakonu sem var í 13. sæti á lista Flokks fólksins í Reykjavíkurkjördæmi suður í alþingiskosningum. Í húsinu býr líka sonur Andreu sem fæddur er 2016. 

Inga Sæland festi kaup á blokkaríbúð við Maríubaug 2021. Afsalið fór fram 2022.

Keypti af Brynju leigufélagi 

Árið 2021 festi Inga kaup á 148 fm íbúð við Maríubaug í Grafarholti í Reykjavík. Íbúðina keypti hún af Brynju leigufélagi. Um er að ræða íbúð á fyrstu hæð ásamt bílskúr. Fyrir íbúðina greiddi Inga 58.500.000 kr. og er þar með lögheimili ásamt eiginmanni sínum, fyrrnefndum Óla Má Guðmundssyni, en saman eiga þau fjögur börn sem eru fædd á árunum 1978-1987. Inga er ein skráð fyrir báðum fasteignunum þótt hjónin hafi verið lengi í samvistum. 

Á dögunum sagði Smartland frá því að íbúð í Ingu Sæland-blokkinni við Maríubaug væri á sölu. Íbúðin er ennþá óseld ef einhver er í húsnæðisleit. 

Frétt af mbl.is

Dreymir þig um að verða nágranni Ingu Sæland?

• 2 blogg um fréttina

Bloggað um fréttina

• Arnar Þór Jónsson: "Eru Íslendingar heimskari en aðrar þjóðir?"
• Ingólfur Sigurðsson: Stjórnin fær á sig verðuga gagnrýni