Litaval hefur áhrif á líðan fólks

Upp­á­halds­horn Önnu Berg­mann á heim­il­inu er í stof­unni þar sem morg­un­boll­inn er iðulega drukk­inn, bæk­ur lesn­ar og kvöld­spjallið tekið.

Anna Berg­mann býr í fal­legri þriggja hæða íbúð í Vest­ur­bæn­um ásamt Atla eig­in­manni sín­um. Þau fluttu í hana árið 2019 og hafa gert fal­legt í kring­um sig. Þau eiga sam­an tvo stráka, Mána og Marinó, og hund­inn Emmu.

„Svo var ég svo hepp­in að eign­ast tvö bón­us­börn, Breka og Sunnu,“ seg­ir Anna.

Anna starfar sem markaðsstjóri Slipp­fé­lags­ins og hef­ur gríðarleg­an áhuga á markaðsheim­in­um, tísku, fag­ur­fræði og heil­brigðu líferni. Upp­á­halds­horn Önnu á heim­il­inu er í stof­unni.

„Þegar gengið er upp í aðal­rými íbúðar­inn­ar er þetta í raun það fyrsta sem tek­ur á móti manni. Þar hanga mynd­ir af strák­un­um okk­ar sem eru dýr­mæt­ustu mun­irn­ir á heim­il­inu. Stóru glugg­arn­ir heilla augað og svo er ekk­ert betra en að hjúfra sig uppi í sófa með kerta­ljós alls staðar í kring. Í þessu rými fæ ég líka að eiga minn heil­aga „me-time“ þegar syn­ir mín­ir eru farn­ir að sofa,“ seg­ir Anna.

Hún seg­ist hafa átt marg­ar dýr­mæt­ar stund­ir í þessu rými.

„Þarna hef ég verið með börn­in mín agn­arsmá á meðan ég var í fæðing­ar­or­lofi. Ófáir morg­un­boll­ar hafa verið drukkn­ir, bæk­ur lesn­ar og þætt­ir kláraðir í þess­um sófa okk­ar. Við hjón­in eig­um okk­ar kvöld­spjall í þessu rými og gæðastund­ir með börn­un­um.“

Spá­irðu mikið í inn­an­húss­hönn­un?

„Ég gerði það ekki nei, en núna starfa ég í máln­ing­ar­geir­an­um og finnst mér því mik­il­vægt að vera með putt­ann á púls­in­um þegar kem­ur að lita­tísku og öðru sem teng­ist inn­an­húss­hönn­un. Ég finn að áhug­inn fer vax­andi og fannst mér sem dæmi ótrú­lega skemmti­legt að gera barna­her­bergi fyr­ir strák­ana mína. Mér finnst það skipta miklu máli að líða vel í hverju rými. Lita­val hef­ur mik­il áhrif þar og ég er mjög spennt að fara að mála allt heima í mjúk­um lit sem gef­ur manni hlýtt faðmlag.“