Tinna Bryde, fast­eigna­sali hjá Páls­son fast­eigna­sölu, svar­ar spurn­ing­um les­enda hvað varðar fast­eign­ir og fast­eigna­kaup. 

Hæ,

nú er farið að þrengja aðeins hjá okk­ur í fjöl­skyld­unni og okk­ur vant­ar að stækka við okk­ur. Hvernig finn ég út hversu dýra fast­eign ég get keypt?

Kveðja, 

BH

Sæl og takk kær­lega fyr­ir spurn­ing­una!

Þegar þú ert að meta hversu dýra fast­eign þú get­ur keypt, þá eru tvö atriði sem skipta mestu máli:

1. Eigið fé – hvað átt þú mikla pen­inga til út­borg­un­ar?

Lán­veit­end­ur lána yf­ir­leitt allt að 80% af kaup­verði fast­eign­ar. Því þarftu að eiga að minnsta kosti 20% sjálf/​ur. Fyrstu kaup­end­ur þurfa hins veg­ar að eiga 15%.

Dæmi:

Ef þú ert að skoða 80 millj­óna króna eign:

• Fyrsti kaup­andi þarf að eiga 12 millj­ón­ir.
• Aðrir kaup­end­ur þurfa að eiga 16 millj­ón­ir.

Ef þú átt fast­eign í dag og eigið fé þitt er bundið í eign­inni þá er eigið fé mis­mun­ur­inn á markaðsvirði eign­ar­inn­ar og þeim lán­um sem hvíla á henni. Þú get­ur fengið verðmat hjá fast­eigna­sala eða notað ein­föld verk­færi á net­inu eins og til dæm­is verðmat.is til að áætla virði á eign­inni þinni.

      2. Greiðslu­geta – hvað get­ur þú greitt af láni?

Hér skoðum við regl­ur um heild­ar­greiðslu­byrði lána og bráðabirgðagreiðslu­mat:

• Regl­ur Seðlabank­ans um greiðslu­byrði: Af­borg­un lána má ekki vera hærri en 40% hjá fyrstu kaup­end­um og 35% hjá öðrum - af ráðstöf­un­ar­tekj­um heim­il­is­ins. Dæmi: Ef ráðstöf­un­ar­tekj­urn­ar eru 1.000.000 kr. á mánuði, þá má greiðslu­byrði lána ekki fara yfir 350.000–400.000 kr.
• Bráðabirgðagreiðslu­mat: Flest­ar lána­stofn­an­ir bjóða upp á bráðabirgðagreiðslu­mat á heimasíðum sín­um. Það er ókeyp­is og hjálp­ar þér að sjá hversu háu láni þú get­ur greitt af, miðað við tekj­ur, skuld­ir og fram­færslu.

Góður und­ir­bún­ing­ur skipt­ir máli. Ef þú veist hvað þú átt mikið eigið fé og hef­ur hug­mynd um greiðslu­getu þína, þá ertu í betri stöðu þegar kem­ur að því að leita að réttu eign­inni og leggja inn kauptil­boð. Það get­ur líka skipt máli gagn­vart selj­anda – þeir eru oft­ar til­bún­ir að taka til­boði frá kaup­anda sem er vel und­ir­bú­inn.

Kær kveðja,

Tinna Bryde fast­eigna­sali. 

Ligg­ur þér eitt­hvað á hjarta? Þú get­ur sent Tinnu spurn­ingu HÉR. 

Tengd­ar frétt­ir

Spurðu fast­eigna­sal­ann

Mun fast­eigna­verð hækka?

• Hvernig get ég fengið sem mest fyr­ir fast­eign­ina mína?
• Yf­ir­gaf fjár­mála­heim­inn og gerðist fast­eigna­sali
• Fólk get­ur sparað millj­ón­ir með því að borga inn á lánið
• End­ur­fjármagnaði og sparaði 60.000 krón­ur á mánuði

» Fleiri tengd­ar frétt­ir

• Blogga um frétt