Smartland Mörtu Maríu | Heimili og hönnun | mbl | 2.6.2025 | 11:32

Egill Heiðar og Kittý keyptu einbýli í Garðabæ

Egill Heiðar Anton Pálsson og Kittý Johansen hafa fest kaup á einbýli í Garðabæ. Samsett mynd

Egill Heiðar Anton Pálsson nýráðinn Borgarleikhússtjóri og Kittý Johansen veitingahúsaeigandi hafa fest kaup á einbýlishúsi í Garðabæ. Hann tók við starfinu á dögunum af Brynhildi Guðjónsdóttur leikkonu og leikstjóra. Hann hafði búið lengi í Noregi, þar sem hann var leikhússtjóri, áður en hann flutti til Íslands.

Um er að ræða 256 fm einbýli við Melhæð í Garðabæ.

Húsið var reist 1992 og býður upp á marga möguleika.

Eitt af því sem er athyglisvert við húsið er að á efri hæðinni er lítill pallur, eða svið, þar sem hægt er að láta ljós sitt skína, eða leika listir sínar. Það er því ekki skrýtið að leikhússtjórinn hafi fallið fyrir þessum óvenjulega sviði sem vísar inn í stofuna.

Húsið við Melhæð er á tveimur hæðum og á pöllum og hefur að geyma mörg falleg smáatriði sem eru eftirsóknarverð á heimilum. Þar eru til dæmis fallegir gluggar en í stofunni er líka hátt til lofts. Í kringum húsið er svo mjög gróinn og fallegur garður.

Parið greiddi 166.000.000 kr. fyrir húsið.