Pistlar:

Þetta ár gefur fyrirheit um að verða öðruvísi en öll önnur ár hingað til og við sem höfum verið að bíða óþolinmóð undanfarin ár eftir því að eitthvað breytist og að fleiri vakni til vitndar um vitundarbreytinguna miklu þurfum ekki að bíða lengur. Við verðum væntanlega jafn undrandi og margir aðrir yfir þeim uppljóstrunum og umbreytingum, sem eiga eftir að verða á árinu og eru þegar að byrjaðar að koma fram.

Við erum í orku sem hefur aldrei verið á Jörðinni áður svo allt er að breytast. Gos á Sólinni hafa stóraukist á síðasta ári og halda áfram að aukast. Við erum að sjá aðra liti á Norðurljósunum en nokkru sinni fyrr, því við skynjum orðið meira litróf.

Samtalan af árinu 2025 er níu, og nían er táknræn fyrir endalok hluta eða hápunkt þeirra – og eins og alltaf þá marka líka endalok, upphaf að einhverju nýju. Það verður því mikið um tilfærslur úr því gamla yfir í hið nýja á þessu ári.

Þegar kínverska nýárið heldur innreið sína undir lok janúar kallast komandi ár hjá þeim ár Snáksins, en snákurinn liggur yfir leyndarmálum og er að mörgu leiti tengdur Sporðdrekanum í vestrænni stjörnuspeki. Því eiga mörg leyndarmál eftir að koma upp á yfirborðið, meðal annars leyndarmál tengd sögu Jarðar og fornra menningaheima.

SNÁKURINN SKIPTIR UM HAM

Snákurinn skiptir líka um ham og má því líkja honum við Plútó sem stjórnar Sporðdrekanum, en þegar skipt er um ham verða hlutirnir aldrei aftur eins – og þeir verða það ekki eftir að árinu 2025 lýkur. Vitund okkar kemur til með að hafa víkkað út og vitundarvakningin hefur átt sér stað og hún verður ekki dregin til baka aftur.

Hlutirnir eiga eftir að ganga hratt fyrir sig á þessu ári einkum þó frá júlí og fram í nóvember, en þá verður Úranus í Tvíburunum – Ekki það að eitthvað hægi á þeim eftir það að ráði, því meðvitund okkar er að víkka út í stökkum svo allt verður á hraðferð.

Við megum eiga von á miklu vatni á þessu ári, sem þýðir flóð í ám og vötnum og hugsanlega hærra sjávarborð í mars og apríl, en væntanlega líka október – en það verður líka mikil eldorka í gangi, því bæði Neptúnus (30.03.25) og Satúrnus (lok maí) fara inn í eldmerkið Hrútinn. Út frá stöðu plánetanna í hinum ýmsu stjörnumerkjum, þá er helst skortur á Jarðarorku, því þótt Úranus fari inn í Nautið aftur í nóvember, þá er Úranus pláneta óstöðugleika og hins óvænta, eldgosa og jarðhræringa, svo hann kannski lítinn stuðnings.

JARÐTENGING MIKILVÆG

Því er mikilvægt fyrir okkur sjálf að jarðtengja okkur og ef við getum ekki gert það með því að ganga berfætt á grasinu, þá er gott að fá sér mottu við skrifborðið sem er jarðtengd eða lak til að sofa á sem er með jarðtengingu – og svo vinna að því að halda innri ró.

Líklegt er að mikið álag verði á taugakerfi flestra fá júlí og fram í nóvember á meðan Úranus er í Tvíburunum, því Tvíburarnir tengjast hugsanaferli okkar og taugakerfinu. Sumum kann því að finnast allar upplýsingarnar sem inn streyma yfirþyrmandi og þá sem aldrei fyrr er mikilvægt að stíga til hliðar, leita inn á við og stunda Hjartaöndun eða aðra iðkun sem róar taugakerfið.

Umhverfið í kringum okkur getur orðið frekar kaótískt þegar gamla kerfið er að hrynja, en ástæða þess er sú að tíðnin hefur hækkað svo mikið að sú lága tíðni sem hélt gömlu kerfunum saman er ekki lengur til staðar. Því er ekkert sem viðheldur gömlu kerfunum. Tíðnin heldur áfram að hækka, bæði vegna umbreytinga á Jörðinni sjálfri svo og á okkur, svo við verðum að læra að finna innri ró og kyrrð innra með okkur sjálfum til að standa af okkur breytingarnar.

JÖRÐIN ER VITUNDARVERA

Við eigum eftir að tengjast meðvitund Jarðarinnar á þessu ári á dýpri hátt en við höfum gert hingað til, því Jörðin er lifandi vitundarvera – þótt við höfum almennt talið okkur aðgreind frá henni og hafa heimild til að ganga á gæði hennar að vild. Það á eftir að breytast, einkum eftir að Tunglóðurnar fara úr Hrúti og Vog og inn í Fiskana (Norður Nóðan) og Meyjuna. Þá er líklegt að við förum að tengja okkur við forna visku og þekkingu, sem er að koma til baka til okkar samhliða því sem Jörðin og við hækkum í tíðni.

ÁHRIF SATÚRNUSAR OG NEPTÚNUSAR

Ef við erum með einhverjar plánetur í afstöðu við samstöðu Satúrnusar og Neptúnusar í júlí á þessu ári, eru líkur á að við förum í gegnum umbreytingu sem hefur viðvarandi áhrif á okkur – en í raun á slík umbreyting við um stóran hluta ársins og ýmsar aðrar afstöður plánetanna.

Frá júlí til nóvember eru líkur á að fólk verði eirðarlaust eða kvíðið, með mikla löngun í meira frelsi og að komast úr þeim höftum sem það er bundið í. Við gætum því tekið Quantum stökk fram á við og brotist út úr mynstrinu sem við höfum verið föst í. Við gætum gert stórtækar breytingar á eigin lífsstíl, fengið einhverjar snilldarhugmyndir eða opnað hjarta okkar á nýjan máta og unnið meira við það að hjálpa öðrum.

TÍMALÍNURNAR

Það eru ótal tímalínur í gangi, en þó eru tvær áberandi tímalínur meðal heildarinnar og bilið á milli þeirra breikkar hratt. Önnur þeirra tengist mjög tilbúinni tækni og stríðsrekstri og snýst um eigin hag – á meðan hin tengist meira kærleiksríkri þjónustu við aðra, sem byggist á því að hjálpa og deila með öðrum. Þessar tímalínur eiga eftir að þróast enn frekar, en að endingu koma þær til með að stefna að einingarmeðvitundinni, því að við erum öll eitt. Við þurfum hins vegar á meðan á þessu niðurbrotsferli stendur að læra að horfa á hið gamla hrynja, án þess að láta það trufla okkur.

PLÚTÓ Í VATNSBERA

Síðast þegar Plútó var í Vatnsberanum, snérist orka hans um að draga úr valdi kirkjunnar og konungaveldisins, samanber frönsku byltinguna og uppreisn landnema í Bandaríkjunum, sem vildu komast undan valdi Bretakonungs og stofnuðu sameinuð ríki Ameríku - U.S.A. Nú snýst orka hans um hrun stórfyrirtækja, stofnana og stjórnvalda, sem hafa ekki okkar besta hag í huga. Þess vegna erum við að sjá hverja ríkisstjórnina á eftir annarri falla eins og þá þýsku, þá frönsku og Assad í Sýrlandi, auk þess sem Kanadíska ríkisstjórnin stendur völtum fótum, enda er Trudeau búinn að segja af sér. Það er mikil umbylting í gangi og árið er bara rétt að byrja.

Evrópusambandið stendur höllum fæti, því Neptúnus er í andstöðu við rísingu þess og í 90 gráðu spennuafstöðu við miðhimin þess, sem telst vera Evru gjaldmiðillinn, auk þess sem Úranus er í samstöðu við Tunglið í korti sambandsins, en Tunglið tengist fólkinu og íbúar margra þjóða eru að rísa upp gegn ofurvaldi sambandsins, sem ber ekki hag allra fyrir brjósti.

KALI YUGA TÍMABILIÐ AÐ ENDA

2025 er umbreytingarárið mikla en þegar kemur fram á árið 2026 eigum við eftir að ná betur áttum á því sem er að gerast og aðlagast breytingunum. Það eru ekki bara plánetur sem eru að skipta um merki sem eru að hafa þessi áhrif, heldur erum við að að enda 24.000 ára tímabil samkvæmt indverskri stjörnuspeki, svokallað Kali Yuga tímabil, sem kallast tímabil myrkurs og fáfræði, en það endar í mars á þessu ári.

Vegna þessara umbreytinga allra eru líkur á að mörg gömul kerfi breytist á árinu, einkum frá því um mitt ár vegna þess að þá verður Úranus í Tvíburunum. Má þar meðal annars nefna menntakerfið, réttarkerfið, heilsukerfið, fjármálakerfið og stjórnmálakerfið.

Við getum líka séð endalok þessarar frægðardýrkunar sem tengist Hollywood, vegna þess að Neptúnus er að fara úr Fiskamerkinu yfir í Hrútinn, svo það er upphafið á endinum á þessari ímynd Hollywood – en á sama tíma upphafið á endalokum þess að setja vald sitt í hendur einhverra yfirvalda.

Við sem einstaklingar erum að taka völdin í eigin lífi í okkar eigin hendur, svo þetta gæti líka haft áhrif á hefðbundin trúarkerfin eins og við höfum þekkt þau hingað til og þá uppbyggingu þeirra sem hefur verið miðast við að stjórna fólki.

NÆMI OKKAR AÐ AUKAST

Á sama tíma kemur næmi okkar til með að aukast, svo við förum að bera meiri umhyggju fyrir öðrum, svo og fyrir dýrum í umhverfi okkar. Við höfum öll búið yfir næmi sem við tökum eftir þegar við hugsum um einhvern og hann hringir í okkur rétt á eftir – en næmi okkar á eftir að aukast langt umfram það. Við komum til með að skynja að allt er orka og tíðni ekki síst vegna allra tækjanna sem í kringum okkur eru og gefa frá sér rafsegulsviðsbylgjur, sem geta haft skaðlega áhrif á heilsu okkar.

Við komum líka til með að skynja náttúrulegu orkuna frá þeim tíðnum sem fylgja sólgosum og eru líkleg til að aukast, jafnvel svo mjög að það verði svo öflug gos að þau slái út rafmagn á Jörðinni eða lami internetið.

MEIRA UM JARÐSKJÁLFTA 

Allar líkur eru á að það verði meira um jarðskjálfta á þessu ári og öfgafullt veðurfar, meðal annars með meiri flóðum í mars og apríl, þegar mikið af plánetum verður í Fiskamerkinu – og svo aftur í október þegar Neptúnus verður á síðustu gráðunni í Fiskunum í nóvember og í samstöðu við Satúrnus. Á öðrum stöðum Jarðar gæti svo verið meira um þurrka, en Satúrnus í Hrút tengist þurrkum. Í tengslum við þessar breytingar eru líkur á að það verði miklir fólksflutningar milli svæða.

Vatnsberinn tengist æskunni og því eru líkur á að margar frábærar hugmyndir og lausnir komi fram frá ungu fóku, en þær eiga væntanlega eftir að hafa umbreytandi áhrif á Jörðina og  endurvinnslu á henni. Hafið því augun opin fyrir þeim.

Líkur eru á meiri tengingu við verur annars staðar úr Galaxýinu, sem flestar eru friðsamlegar. Höldum því huganum við friðsamleg samskipti og treystum því að þau verði á þeim nótum.

FRÉTTAMIÐLAR OG FJÁRMÁLIN

Líkur eru á að allt vald meginstraumsfjölmiðla minnki á þessu ári og að fólk beini sjónum sínum frekar að sjálfstæðum fréttamiðlum, auk þess sem fólk fer að treysta meira á sitt eigið innsæi þegar kemur að fréttum og fólki.

Fjármálakerfi heims verður hverfult á þessu ári. Við getum átt von á því að crypto-mynt verði meira áberandi á þessu ári, en sé henni stjórnað af bönkum – eða ríkisstjórnum er best að velja aðrar leiðir. Framtíðin liggur þó í kryptó og svo málmum eins og gulli og silfri.

Líkur eru á að það verði mikið um hópa sem berjast fyrir bæði samfélagslegum réttindum og mannréttindum um allan heim á þessu ári. Fólk vill sjálfræði og alls konar frelsishópar eru nú þegar áberandi og fleiri eru líklegir til að myndast.

GERVIGREIND OG FLUG

Meira verður um gervigreind á þessu ári og því getur stundum verið erfitt að greina á milli þess sem er vélrænt og þess sem er unnið af mannfólkinu. Fleiri og fleiri störf fara í hendur vélmenna, svo líkur eru á atvinnuleysi hjá fólki og þeim áhrifum sem því fylgir á hagkerfið, en hvort sem okkur líkar það betur eða verr þá er allt að verða tæknivæddara. Væntanlega verður meira um að drónar afhendi vörur sem pantaðar eru á netinu hjá stórfyrirtækjum eins og Amazon.

Líklegt er að mikið verði um mál tengd flugi þetta árið, einkum flugi hraðfleygra farartækja út í heim, jafnvel þótt það taki tíma fyrir almenning að fá að njóta slíks. Vegna spennuafstöðu Satúrnusar við Júpiter eru líkur á að það verði einhverjar takmarkanir á flugi í norðurhluta heims, hvort sem það verður vegna mikils veðurofsa eða af öðrum ástæðum.

FISKVEIÐAR OG SKIPAFERÐIR

Líklegt er líka að það verði einhver truflun eða takmarkanir á fiskveiðum og skipasiglingar gætu orðið erfiðar á þessu ári, sem gætu leitt til nýrrar þróunar í ferðum um Jörðina. En allt tengt höfunum getur orðið áhugavert í kringum þann tíma sem Úranus lendir í samstöðu við Sedna, gyðju Heimskautahafsins, fremst í Tvíburunum. Þegar Sedna fór inn í Tvíburana í júní 2023 lenti kafbátur í vanda og einhverjir létust. Samstaðan á milli Úranusar og Sedna verður þann 24. Maí, svo fylgist með hvað gerist í í kringum þann tíma, sem tengist hafinu og siglingum um það.

Líklegt er að meiri tengingar verði á milli vísindanna og hins andlega á þessu ári, að hluta til vegna þess að Satúrnus er í Fiskum, en líka vegna allra þeirra mælinga sem verið er að gera á meðvitund fólks, sem tengir saman hið dulræna og hið vísindalega, en þar hefur Dr. Joe Dispenza og teymi hans unnið mikila vinnu. Þeir kalla verkefnið Bláa heilann og hafa uppgötvað fjölvídda geometrísk form í mannsheilanum, sem getur unnið í ellefu víddum. Þetta er  mjög spennandi og á eftir að auka enn vitund okkar og tengingu inn á aðrar víddir og minningar um forna visku.  Líklegt er að þetta auki enn tengingu okkar við aðrar verur í Galaxýinu og tengingar við þá sem búa í innri jörðinni.

Mögulega verða breytingar á fæðuframboði okkar tengdar ræktun víða um heim. Gamlar aðferðir eiga eftir að víkja fyrir nýjum og auka framleiðslu á matvöru á hærri tíðni.

HUGSANAFLUTNINGUR

Með hækkandi tíðni á jörðinni og auknu andlegu næmi, ásamt skilningi á að hugsanir okkar og tilfinningar  hafa áhrif á heildina, komum við til með að taka meiri andlega ábyrgð og beina athygli okkar meira frá huganum og í átt til hjartans.

Hugsanaflutningur mun aukast og við höfum ekki þörf á að tala eins mikið, en við vitum að hjartað er það líffæri okkar, sem tengir okkur við Kosmosið. Í kringum hjartað er stærsta rafsegulsviðið og það tengir okkur við rafsegulsvið heildarinnar, en við eigum eftir að uppgötva helga hjartað sem er orkuhjartað okkar, nokkurs konar orkuhringiða (vortex), sem Rudolf Steiner og Dr. Tom Cowen hafa talað um, en það er tengingin milli hins mannlega hjarta og hjartans í galaxýinu. 

Hvort sem við náum utan um þessi hugtök eða ekki þá erum við á leið inn í meiri kærleiksorku með hækkandi tíðni. Líkur eru á að öfgafull veður á næstunni þjappi fólki meira saman og að samkennd fólks muni aukast.

VÍÐARA SJÓNARHORN

Og svo bara eitt í lokin. Áður en plánetan Úranus var uppgötvuð, sáu menn með berum augum ekki lengra út í geiminn en að Satúrnusi. Þess vegna hrundu mörg viðmið þegar Úranus uppgötvaðist því þá gátum farið lengra en augun höfðu áður numið. Þegar þetta gerðist var plánetan í Tvíburunum. Nú er Úranus að fara aftur inn í það stjörnumerki í júlí á þessu ári og því eru líkur á að við komum til með að öðlast víðara sjónarhorn á kosmosið og það Galaxý sem við búum í.

Það verður því margt að læra á þessu komandi ári og margar breytingar sem við þurfum að aðlagast, en sama hvað á gengur er mikilvægt að halda alltaf innri ró og vinna allt út frá hjartanu. Þannig breytum við heiminum sem við búum í til betri vegar.

Hægt er að horfa/hlusta á yfirlitið á YouTube rásinni minni.

www.gudrunbergmann.is