Pistlar:

Á sinn hátt var merkilegt að hlusta á umræðu um útlendingamál á Sprengisandi í dag. Hugsanlega sýnir umræðan þar hvaða breytingar eru að verða í almennri umræðu um þessi mál, vonum seinna. Lengst af hefur verið lokað á umræðu eins og þá sem fór fram í þættinum í dag og reyndar einnig í öðrum þáttum Bylgjunnar. Þessi ritstjórnarstefna hefur einnig birst í umræðu hjá Ríkisútvarpinu þar sem reynt hefur verið að beina umræðu um útlendingamál frá staðreyndum og erfiðum upplýsingum. En nú er öldin önnur og almenningur sér að við Íslendingar höfum búið við stefnuleysi og óstjórn í málaflokknum og algerlega hundsað öll viðvörunarorð sem hafa sótt rök sín og dæmi til nágrannalandanna.

Samfylkingarmaðurinn Teitur Atlason lýsti því þannig í þættinum að þessi umræða hefði lokast inni í bergmálshellum og nú væri ástæða til að taka heiðarlega umræðu byggða á staðreyndum málsins. Það er lengi von á einum er stundum sagt enda hefur Samfylkingin ásamt öðrum vinstri flokkum ekki gefið neitt færi á slíkri umræðu og þá ekki hikað við að hengja merkimiða eins og felst í rasistastimplinum á þá sem mæla öðruvísi en þeir. Þetta sést enn í furðulegri umræðu um þá sem hafa staðið fyrir mótmælafundum á Austurvelli undir íslenska fánanum að undanförnu. Þingmaður Samfylkingarinnar gekk meira að segja svo langt að segja rasista hafa „misnotað“ þjóðfána Íslendinga á mótmælum á Austurvelli um síðustu helgi. Er verið að amast við að íslenski fáninn sé sýndur eða notaður á Austurvelli þar sem fánaberar Palestínu mæta í hverri viku?

Umræðan er að breytast

Eðlilegt er að spyrja hvort nú séu að verða breytingar í málaflokki útlendinga? Jú, umræðan er augljóslega að breytast en það má efast um að stjórnvöld skilji enn vandann, hvað þá að rétt sé brugðist við honum. Í Sprengisandsþættinum benti Þórarinn Hjartarson hlaðvarpsstjórnandi á að það væri nauðsynlegt að loka landamærunum og er það samhljómur við það sem margoft hefur verið bent á hér í pistlum. Staðan er einfaldlega þannig að innviðir landsins geta ekki unnið úr þeim fjölda sem hingað er kominn og er að sliga fjárhag ríkis- og sveitarfélaga og leggja álag á okkar félagslegu innviði. Á hverjum degi birtast merki um það, séu menn yfir höfuð að horfa. Margir leika sér enn að því að gaslýsa og rugla umræðuna, eins og með því að blanda saman umræðu um erlent vinnuafl og stöðu flóttamanna. Það er sitthvað hluturinn, að fólk komi hingað til að vinna eða þeir sem koma hingað og sækja um stöðu flóttamanns.

Teitur sótti nokkur dæmi til nágrannalandanna en eins og margoft hefur verið fjallað um hér í pistlum hafa bæði Danmörk og Svíþjóð þurft að bregðast við. Pólitískt séð þá gerðist það að danskir jafnaðarmenn tóku yfir útlendingastefnu Danska þjóðarflokksins (Dansk Folkeparti) sem fram að því hafði verið jaðarsett og hafnað í meginstraumsumræðu. Undir forystu Mette Frederiksen, núverandi forsætisráðherra Danmerkur og formanns danska Jafnaðarmannaflokksins, breyttu danskir jafnaðarmenn um kúrs. Kristján Kristjánsson, þáttastjórnandi, rifjaði upp umræðu í eigin þætti þar sem þeir tókust á um þetta Sigmundur Davíð Gunnlaugsson formaður Miðflokksins og Logi Einarsson þáverandi formaður Samfylkingarinnar. Staðreyndin er sú að fyrir meira en 10 árum varð sú umbreyting í afstöðu til flóttamanna í Danmörku og Svíþjóð sem við loksins núna fáum umræðu um hér á Íslandi. Ummæli Teits í þættinum í dag hefðu fengið hávær mótmæli innan Samfylkingarinnar fyrir nokkrum misserum þó að þau séu mjög í takt við ummæli jafnaðarmanna í Danmörku.

Barátta Loga gegn stefnu Mette

Í febrúar 2018 upplýsti Logi í samtali við fjölmiðla að hann hefði fengið kynningu á þessari stefnu frá Mette Fredriksen, formanni danska jafnaðarmannaflokksins, á formannafundi norrænu jafnaðarmannaflokkanna daginn áður.

„Hún sló mig um margt afar illa og lét hana vita mjög skýrt um mína afstöðu,“ segir Logi í samtali við Vísi. Um leið upplýsti Logi að hann vonaðist til þess að aðrir jafnaðarflokkar á Norðurlöndum feti ekki í spor danska systurflokksins og sagðist Logi ætla að beita sér hart fyrir því að Samfylkingin standi fast í lappirnar og gefi aldrei afslátt á mannúð.

„Að flokkurinn beiti sér fyrir því að við öxlum okkar ábyrgð, með hana að leiðarljósi, í víðtæku samstarfi við aðrar þjóðir,“ segir Logi og bætir því við að hann segist trúa því að það sé rétta leiðin til að takast á við þær hræðilegu aðstæður sem fólk á flótta frá stríði og ömurlegum aðstæðum býr við.

„Það er mikilvægt að til séu skýrar reglur um þessi mál, sem gerir okkur kleift að búa nýjum landsmönnum góðar aðstæður. Gefa þeim möguleika á að aðlagast okkar samfélagi og gildum; þannig munum við njóta ríkulegra ávaxta þeirra,“ segir Logi og ítrekar þá að það er klárlega ekki rétta leiðin að reisa múra um Vesturlönd og búa til fyrsta og annars flokks þjóðfélagsþegna eða ala á ótta og tortryggni.

„Danskir jafnaðarmenn tala um að þetta sé uppgjör við það hvað það er að vera húmanisti en nýja stefnan talar því miður öðru máli.“

Það er nauðsynlegt að rifja upp hverjir bera ábyrgð á núverandi stefnu í útlendingamálum nú þegar menn eru að uppgötva að við fórum ranga leið. Auk Samfylkingar fóru Píratar þar framarlega og einnig þingmenn VG. Það er ekki tilviljun að þessum flokkum hefur nú verið hafnað en landsmenn sitja uppi með stefnu þeirra.