Fullt var út úr dyrum í verslun Nova á Klúðurkvöldi Startup SuperNova en viðburðurinn var hluti af nýafstaðinni Nýsköpunarviku. Þekktir reynsluboltar úr nýsköpunarumhverfinu deildu fyndnum sögum af mistökum og klúðri við uppbyggingu sprotafyrirtækja sinna.
Ásta Sóllilja Guðmundsdóttir, framkvæmdastjóri KLAK – Icelandic Startups, og Sigurbjörn Ari Sigurbjörnsson, markaðsstjóri Nova, opnuðu viðburðinn við dynjandi lófaklapp. Tilefnið var að opnað hefur verið fyrir umsóknir í Superclass Startup SuperNova á vefsíðu viðskiptahraðalsins. Þetta er í þriðja sinn sem Klúðurkvöld er haldið í tengslum við Startup SuperNova hraðalinn en slíkir viðburðir eru vel þekktir erlendis.
Klúðursögur reynsluboltanna kitluðu hláturtaugarnar í þéttsetnum salnum en Finnur Pind, stofnandi og framkvæmdastjóri Treble Technologies, gaf tóninn þegar hann steig fyrstu á svið og sagði skemmtilegar sögur af uppbyggingu fyrirtækis síns.
Þorbjörg Helga Vigfúsdóttir, stofnandi Kara Connect, var næst á svið og fór á kostum þegar hún sagði frá gömlu klúðri og einu glænýju. Georg Lúðvíksson, meðstofnandi og fyrrum framkvæmdastjóri Meniga, tók við hljómnemanum og fékk alla viðstadda til að leggja við hlustir, en stórsniðug frásögn hans vakti mikla athygli.
Að lokum var það Ragnhildur Ágústsdóttir, jafnan kölluð Lady Lava, sem sló á létta strengi þegar hún sagði frá rússíbanareiðinni við uppbyggingu fyrirtækisins Lava Show, en saga þess hófst árið 2016 í stærstu frumkvöðlakeppni Íslands, Gullegginu.