Yfir 40 sprotateymi skráðu sig til leiks í Superclass Startup Supernova, sem eru vinnustofur fyrir frumkvöðla, sem fram fór í Sykursalnum í Grósku fyrir helgi. Markmiðið með Superclass er að undirbúa teymin til þess að sækja um í Startup Supernova-hraðalinn sem verður hefst í fimmta sinn eftir Verslunarmannahelgi. Sigríður Snævarr lét sig ekki vanta en hún var fyrsta konan til þess að verða sendiherra. 

Reynsluboltar úr frumkvöðlasenunni og ýmsir sérfræðingar úr atvinnulífinu komu til að miðla þekkingu sinni og hjálpa sprotateymunum að gera 18 mánaða aðgerðaráætlun fyrir verkefnin sín. Meðal fyrirlesara voru Margrét Tryggvadóttir forstjóri Nova sem lagði áherslu á í erindi sínu mikilvægi þess að byggja upp sterkt samheldið teymi. Tryggvi Þorgeirsson, framkvæmdastjóri og meðstofnandi Sidekick Health, kom líka fram og fór yfir hvernig best er að ná í viðskiptavini og skala fyrirtæki. Jón Ingi Benediktsson, sérfræðingur hjá háskóla-, iðnaðar og nýsköpunarráðuneytinu kenndi vinnustofu um gerð aðgerðaráætlana sprotafyrirtækja og Jason Zhangxiaoyu, landstjóri Huawei Iceland fræddi viðstadda um tækifærin sem 5G- tæknin býður upp á. T

„Við sjáum vel þegar við keyrum vinnustofur eins og Superclass hvað það er mikil gróska í nýsköpunarsenunni á Íslandi. Það er sérstaklega ánægjulegt að sjá hversu fjölbreyttur hópur sótti Superclass í ár en um 30% þátttakenda er af erlendum uppruna. Við hlökkum til að lesa yfir umsóknir í hraðalinn en umsóknarfrestur er til 23. júní. Teymin tíu sem fá sæti í hraðlinum verða síðan tilkynnt þann 11. júlí næstkomandi,” segir Magnús Daði Eyjólfsson verkefnastjóri Startup Supernova hraðalsins.