Íris Dögg og Björn mættu með börnin

Það ríkti mikil fjölskyldustemning í Kringlubíói þegar teiknimyndaterían Ævintýri Tulipop var forsýnd. Um er að ræða þrettán nýja þætti af þessum vinsælu íslensku teiknimyndum en þáttaröðin verður sett í loftið í Sjónvarpi Símans Premium næsta fimmtudag.

Meðal gesta á forsýningunni voru ungu og hæfileikaríku leikararnir sem talsettu aðalpersónur þáttaraðarinnar, Kolbrún Helga Friðriksdóttir (Gló), Móeiður Ronja Davíðsdóttir (Maddý) og Stormur Björnsson (Búi). Stormur bauð foreldrum sínum; þeim Írisi Dögg Einarsdóttur og Birni Stefánssyni á sýninguna. 

Meðal annarra leikara sem komu að talsetningu eru Dagur Atlason (Freddi), Laddi, Jóhann Sigurðarson, Rósa Birgitta Ísfeld og Sigurjón Kjartansson.

Tulipop teiknimyndirnar eru byggðar á samnefndum ævintýraheimi sem leit fyrst dagsins ljós fyrir meira en 10 árum síðan. Yfir 100 manns komu að framleiðslu þessarar metnaðarfullu þáttaraðar, sem hefur nú þegar verið seld til meira en 12 landa og talsett á átta tungumálum.