Það er ekki annað hægt að segja en að Ragnheiður Jónsdóttir rithöfundur kunni að halda partí. Hún fagnaði útkomu sinnar annarrar skáldsögu á Hótel Holti á dögunum og var troðfullt út úr dyrum. Svikaslóð heitir nýjasta afurð Ragnheiðar en hún fjallar um hjónin Sverri og Lísu sem búa í fallegu húsi í Þingholtunum í Reykjavík. 

Sverrir er virtur og vinsæll leikstjóri en Lísa yngri leikkona sem fær takmörkuð tækifæri. Nýjabrumið er farið af hjónabandinu og undir niðri kraumar óánægja og öfund. Þegar sonur mannsins úr fyrra hjónabandi finnst myrtur kemur margt misjafnt í ljós og hjónin þurfa að horfast í augu við brostnar vonir og svik.

Fyrsta bók Ragnheiðar, Blóðmjólk, hlaut glæpasagnaverðlaunin Svartfuglinn í fyrra og nýlega tryggði Sigurjón Sighvatsson sér réttinn til að framleiða sjónvarpsþætti eftir henni.

Eins og sjá má á meðfylgjandi ljósmyndunum var vel mætt í boðið og mikil stemning!