Á fimmtudagskvöldið í síðustu viku var pólska kvikmyndin Woman Of... frumsýnd í Bíó Paradís. Arna Magnea Danks, leikkona og talskona trans réttinda og Magdalena Lukasiak, blaðakona og aðgerðarsinni fyrir réttindum hinsegin fólks, voru glæsilegar saman á sviðinu þegar þær spjölluðu við áhorfendur eftir myndina.

Eins og kunnugt er skráðu þær sig í samband á Facebook ekki alls fyrir löngu. Ástin kviknaði á milli Örnu og Magdalenu í september þegar sú síðarnefnda tók viðtal við Örnu, sem er trans kona og lék aðalhlutverkið í Ljósvíkingum, fyrir fréttaveituna Gay Iceland.

Magdalena flutti til Íslands árið 2015 eftir kosningu hægrisinnaðs forseta í heimalandi hennar Póllandi. Þau tímamót gerðu henni ljóst að hinsegin einstaklingar, eins og hún sjálf, myndu eiga enn erfiðara uppdráttar í samfélaginu. 

Kvikmyndin Woman Of... segir frá lífi Anielu og leið hennar í átt að frelsi sem trans kona í Póllandi. Kvikmyndin er sögð þýðingarmikil fyrir hinsegin fólk og trans manneskjur enda miklir fordómar þar í landi gagnvart þeim sem koma út úr skápnum. Þetta er fyrsta kvikmyndin um trans konu sem framleidd er í Póllandi.

Að sögn Magdalenu verða börn í Póllandi, sem koma út úr skápnum gagnvart foreldrum sínum, ennþá fyrir ofbeldi. „Sum eru rekin að heiman og í verstu tilfellum verða þau fyrir alvarlegum skaða. Það hefur komið fyrir að börnum hafi verið hent út um glugga af eigin foreldrum eftir að hafa komið út úr skápnum," segir hún.