Það var líf og fjör í Tjarnarbíói í gærkvöldi þegar Ífigenía í Ásbrú var frumsýnt. Þar fer Þórey Birgisdóttir leikkona með aðalhlutverkið en tekið er sérstaklega fram að leikritið sé bannað börnum þar sem það fjallar um viðkvæm málefni. 

Berglind Pétursdóttir Festival lét sig ekki vanta á sýninguna og mætti með vinkonum sínum. Verkinu er leikstýrt af Önnu Maríu Tómasdóttur og sá Kristín Hrönn Jónsdóttir um hljóðhönnun. Aðstoðarleikstjóri er Gígja Hilmarsdóttir og skinu þær allar skært á frumsýningunni. 

Ífígenía í Ásbrú (Iphigenia in Splott) eftir Gary Owen er verðlaunaverk sem hefur farið í sigurför um heiminn. Leikritið fjallar um Ífí, stelpuna sem þú tekur sveig framhjá þegar þú mætir henni hauslausri fyrir hádegi. En það sem þú veist ekki er að þú stendur í ævilangri þakkarskuld við hana. Og nú er komið að skuldadögum.