Ráðgjafa- og ráðningafyrirtækið Intellecta flutti á dögunum í nýtt og glæsilegt húsnæði við Höfðabakka 9a. Af því tilefni bauð fyrirtækið viðskipavinum og velunnurum í glæsilegt teiti.

Þangað mættu margir helstu framámenn í íslensku viðskiptalífi og var mikið skrafað í huggulegu andrúmsloftinu. 

„Það er ótrúlegur munur að við skulum vera komin í húsnæði sem er beinlínis sniðið fyrir starfsemi okkar. Við hönnun þess skipti það okkur miklu máli að starfsfólki liði bæði vel og fyndi sér alltaf hentugar vinnustöðvar. Sérlega ánægjulegt er að viðskiptavinir okkar upplifi einnig hlýlegt og notalegt umhverfi,“ segir Einar Þór Bjarnason, framkvæmdastjóri Intellecta.

Hugað að þörfum starfsmanna

Samhliða flutningunum getur Einar þess að fyrirtækið sé búið að vera starfrækt í 25 ár, sem er frábær áfangi. 

„Frá því að Intellecta var stofnað árið 2000 hafa ráðgjafar okkar unnið með stjórnendum fyrirtækja með það markmið að auka árangur, bæta rekstur og efla stjórnun.“ 

Einblínt var á þarfir starfsmanna við hönnun húsnæðisins og skrifstofurýma. Þá var einnig hugað að næðisrýmum. Hönnunin er öll hin glæsilegasta og starfsemi og þarfir viðskiptavina hafðar að leiðarljósi, með huggulegum viðtals- og fundarherbergjum.

Hér að neðan má sjá myndir af gestum teitisins.