Íslensk hönnun er fyrirferðarmikil núna í tilefni af Hönnunarmars sem hófst formlega seinni partinn í dag. Íslenska hönnunarfyrirtækið Fólk Reykjavík bauð í morgunkaffi í morgun í húsgagnaverslun Pennans. Yfirskrift viðburðarins var „Hvað vantar?“ þar sem Tinna Gunnarsdóttir, hönnuður, og Ragna Sara Jónsdóttir, stofnandi og listrænn stjórnandi Fólk Reykjavík, buðu upp á samtal um framtíð íslenskra húsgagna og köfuðu í hönnunararf fortíðar.

Tinna sagði frá hönnunareinkennum föður síns Gunnars Magnússonar sem var einn öflugasti húsgagnahönnuður 20. aldarinnar og hlaut Heiðursverðlaun Hönnunarverðlauna Íslands árið 2021. Ragna Sara ræddi um uppbyggingu á hönnunarlínu Fólk Reykjavík og aukinni áherslu á útgáfu íslenskrar húsgagnahönnunar í samvinnu við Pennann.