Smartland Mörtu Maríu | Samskipti | mbl | 16.4.2025 | 6:00

Er í lagi að „kærastinn“ sé á Tinder?

Valdimar Þór Svavarsson ráðgjafi hjá Fyrsta skrefinu og umsjónarmaður Ráðgjafi hjá Fyrsta skrefinu og Meðvirknipodcastsins.is svarar spurningum lesenda Smartlands. Hér fær hann spurningu frá konu sem er búin að vera að hitta mann í heilt ár og komst að því að hann er að spjalla við aðrar skvísur.

Sæll Valdimar

Ég kynntist manni á stefnumótaforriti og er búin að vera að hitta hann í tæpt ár. Ég veit til þess að hann hefur verið að senda öðrum konum skilaboð sem gerir mig óörugga og hann hefur ekki lokað Tinder-aðganginum sínum en ég var sjálf búin að því fyrir þónokkru síðan. Þessar konur eru víst „vinkonur“ hans, hvað sem það merkir?

Samband okkar hefur að öðru leyti verið gott og við fundið góðan farveg að hittast þegar við erum ekki með börnin okkar. Hann hefur samt hitt börnin mín og ég hans. Þess vegna taldi ég að við værum nokkurn veginn í föstu sambandi en svo frétti ég að hann hefði verið að skrifast á við frænku vinkonu minnar og jafnvel að plana að hitta hana.

Á ég að segja beint út við hann að ég viti til þess að hann fari á bak við mig eða á ég að reyna að fá upp úr honum hvort hann horfi á þetta „samband“ okkar sömu augum og ég?

Kveðja,
ein óviss

Ert þú að hitta mann sem er ennþá á Tinder þótt þið séuð búin að vera saman í ár? Elena Helade/Unsplash

Góðan daginn og takk fyrir að senda þessa fyrirspurn.

Þetta er nokkuð algengt viðfangsefni og svarið er í raun komið hjá þér. Það er alltaf best að spyrja beint út þegar það er mögulegt og eyða allri óvissu í svona málum. Ég mæli með að fá það alveg á hreint hvaða augum hann lítur málið og að þið ræðið saman hvernig þið sjáið fyrir ykkur að haga málum í framhaldinu.

Fyrst og síðast þarft þú sjálf að ákveða hvaða línur þú vilt setja og hvað þú ert sátt við, hvernig samband þú vilt eiga, hvaða þarfir þú hefur og setja skýr mörk hvað það varðar. Þá kemur betur í ljós hvort þið eigið samleið eða ekki.
Gangi þér allt í haginn í þessu.

Kær kveðja,
Valdimar Þór Svavarsson.

Liggur þér eitthvað á hjarta? Þú getur sent Valdimar spurningu HÉR.