Fimm leiðir til að endurvekja neistann í sambandinu

Það er eðli­legt að ástar­sam­bönd breyt­ist með tím­an­um og að fiðrild­un­um í mag­an­um fækki smám sam­an. En það þýðir þó ekki að ást­in sé horf­in, hún þarfn­ast lík­lega ör­lít­ils viðhalds. Með smá fyr­ir­höfn, gleði og kær­leika er vel hægt að vend­ur­vekja neist­ann í sam­band­inu.

End­urupp­lifið góðar minn­ing­ar

Munið hvar þið hitt­ust fyrst? Eða hvar þið trú­lofuðust? Það get­ur haft góð áhrif að heim­sækja staði sem tengj­ast fyrri stig­um sam­bands­ins. Slík heim­sókn get­ur minnt mann á hvers vegna maður féll fyr­ir elsk­hug­an­um til að byrja með.

Komið hvort öðru á óvart

Eitt besta ráðið til að halda spennu í sam­band­inu er að skipu­leggja leyni­leg stefnu­mót fyr­ir hvort annað. Hvort sem það er fínt út að borða í spari­föt­un­um eða í kósígall­an­um. Óviss­an og eft­ir­vænt­ing­in get­ur myndað spennu og gleði sem hjálp­ar til við að kynda und­ir ást­ina.

Prufið nýj­ar upp­lif­an­ir sam­an

Það get­ur verið auðvelt að fest­ast í hvers­dags­leik­an­um. Að prófa eitt­hvað nýtt sam­an, hvort sem það er að elda fram­andi rétt, skrá sig á nám­skeið eða plana óvænta helg­ar­ferð, get­ur slíkt veitt sam­band­inu fersk­an blæ og skapað nýj­ar minn­ing­ar sem styrkja tengsl­in.

Segið oft­ar „takk“

Það er auðvelt að taka hvoru öðru sem sjálf­sögðum hlut eft­ir lang­an tíma í sam­bandi. Með því að þakka fyr­ir smá­atriðin í dag­legu lífi, eins og fyr­ir það að henda rusl­inu eða setja í uppþvotta­vél­ina, sýn­irðu virðingu og kær­leika sem styrk­ir sam­bandið.

Munið að njóta and­ar­taks­ins

Það þarf oft ekki mikið til að viðhalda neist­an­um. Stund­um næg­ir lít­il snert­ing eða augnaráð yfir kaffi­boll­an­um. Faðmist áður en þið farið út í dag­inn. Brostu til mak­ans í eld­hús­inu og segðu eitt­hvað sem fær hann til að roðna. Margt smátt ger­ir eitt stórt. 

• Blogga um frétt