Upphlutur er í eigu Heimilisiðnaðarfélags Íslands sem var stolið af sýningu í Ráðhúsi Reykjavíkur um helgina, er kominn í leitirnar. Með góðri samvinnu lögreglu, Heimilisiðnaðarfélagsins og starfsfólks Ráðhússins tókst að hafa upp á þjófunum og finna þýfið, segir í frétt um málið á vef Reykjavíkurborgar.

Frétt mbl.is: Stal upphlut úr Ráðhúsinu

Sýningin Afrekskonur var opnuð síðastliðinn fimmtudag í tilefni af því að í ár eru 100 ár liðin frá því að íslenskar konur fengu kosningarétt. Tveir búningar voru til sýnis, þjóðbúningur og upphlutur, sem áttu að sýna klæðaburð kvenna á árunum 1910 -20.  Búningarnir voru báðir á gínum sem komið var fyrir uppi á flygli í Tjarnarsal Ráðhússins.

Þjófarnir tóku aðra gínuna niður af flyglinum, fóru afsíðis inn í geymslu, annar stóð vakt á meðan hinn klæddi gínuna úr upphlutnum. Því næst gengu þeir út með upphlutinn og skildu gínuna eftir í geymslunni. Verðmæti búningsins var um ein milljón króna.

Um leið og stuldurinn uppgötvaðist var strax haft samband við lögreglu og skoðaðar myndir úr öryggismyndavélum í Ráðhúsinu. Málið var kært til lögreglu sem kannaðist strax við hverjir væru þarna að verki og höfðu upp á þjófunum og þýfinu.

Heimilisiðnaðarfélag Íslands fagnar því að búningurinn hafi skilað sér ásamt öllum fylgihlutum og Reykjavíkurborg fagnar því að málið hafi fengið farsælan endi.

Þjófnaður af þessu tagi hefur aldrei áður átt sér stað á sýningum í Ráðhúsinu og verður í kjölfarið farið ítarlega ofan í öryggismál í húsinu meðan á sýningum stendur til að koma í veg fyrir að svona lagað geti átt sér stað, samkvæmt frétt Reykjavíkurborgar.

Tengdar fréttir

Þjóðbúningurinn

Þjóðbúningaklæddir þurfa ekki að borga inn

• Halla skartaði þjóðbúningi frá Þjóðdansafélagi Reykjavíkur
• Kona skráir sig á þjóðbúninganámskeið
• Vildi sauma þjóðbúning en lenti ítrekað á vegg
• Dreymir um að sauma sér þjóðbúning

» Fleiri tengdar fréttir

• Blogga um frétt