Tryggvi Freyr Torfason, stjórnandi hlaðvarpsins Þarf alltaf að vera grín?, eignaðist sinn fyrsta rakspíra þegar hann var í fjölskyldufríi í Portúgal þegar hann var 12 ára. Fyrsti ilmur inn var af gerðinni Polo frá Ralph Lauren Blue.

„Það var eitthvað mjög spennandi við að eignast fyrsta rakspírann sinn. Ég fór svo fljótlega upp úr fermingu að nota Armani Mania. Afi minn notaði hann og það var þá sem ég komst að því að lykt er mismunandi á fólki,“ segir Tryggvi.

Hefur smekkur þinn breyst með aldrinum?

„Smekkurinn minn hefur eiginlega ekki breyst mikið. Ég hef alltaf elskað ferska lykt, sítruskeim, og einhverra hluta vegna er kakó oft listað sem eitt af innihaldsefnunum í mínum ilmum. Ég er ekki mikið fyrir of aggresíva lykt eða of kryddaða. Ég hef líka lengi haldið því fram að persónuleiki manns og karakter ilmvatna haldist í hendur.“

Finnst þér ilmvötn og rakspíri vekja sérstakar tilfinningar?

„Ilmir vekja hjá mér góða tilfinningu og spennu jafnvel. Mér finnst ilmvötn og rakspíri ótrúlega mikilvægur hluti af því þegar ég er að fara eitthvað á viðburð eða annað skemmtilegt. Mér finnst ég engan veginn tilbúinn nema ég sé búinn að setja á mig rakspíra, það er punkturinn yfir i-ið.“

Tekur þátt í að velja ilmvatn á konuna

Tryggvi segir það skipta máli að konunni sinni, Árnnýju Sigurbjörgu Guðjónsdóttur, finnist lyktin af sér góð. „Maður vill að hún sé ánægð með lyktina og hefur hún oft tekið þátt í því að velja með mér,“ segir Tryggvi.

En hefur þú skoðun á hennar ilmvötnum?

„Já, ég hef haft mun meiri skoðun og áhuga á þessu en hún og hún hefur treyst mér til að velja góð ilmvötn sem hafa farið henni vel. Ilmurinn sem hún notar í dag og fer henni mjög vel er Her frá Burberry.“

Áttu margar tegundir?

„Eins og er nota ég þrjár tegundir og hef verið að rótera aðeins. Í dag nota ég mest Bad Boy frá Carolina Herrera. En svo nota ég líka Eros frá Versace og Armani Diamonds sem er hættur í framleiðslu.“

Er einhver ilmur á óskalistanum?

„Erba Pura frá Xerjoff og Kirke frá Tiziana Terenzi.“