Eva Amurri, dóttir leikkonunnar Susan Sarandon og leikstjórans Franco Amurri, gekk í hnapphelduna í annað sinn um helgina. Amurri, sem fetaði í fótspor móður sinnar og starfar sem leikkona, giftist matreiðslumanninum Ian Hock í fallegri athöfn í Hudson Valley í New York-ríki yfir helgina.
Amurri, sem klæddist fallegum brúðarkjól eftir hönnuðinn Kim Kassas, fékk á sig töluverða gagnrýni eftir að myndir úr brúðkaupinu birtust á síðum People og á samfélagsmiðlum.
Netverjar létu þung orð falla um klæðaburð brúðarinnar og voru margir sammála um að brúðarkjóllinn hefði verið of lágur yfir brjóstasvæðið, en kjóllinn sem Amurri klæddist er með svokallað „low-cut neckline“.
Amurri gaf lítið fyrir gagnrýni netverja og birti færslu á Instagram Story á mánudag þar sem hún hvatti fólk til að taka skjáskot af brjóstum sínum enda ekki á hverjum degi sem slíkt tækifæri gefst.