Það sem verður heitt og kalt í tísku í vetur

Á haustin skiptum við yfirleitt um gír og erum komin með nóg af því sem við höfum dýrkað síðustu mánuði. Skapið breytist nefnilega oft með árstíðunum. 

Færum okkur yfir í dekkri liti, þykkari efni, kælum augnkremið af augljósri ástæðu og styttum oddhvössu neglurnar. Það þarf að koma þessum mikilvægu tölvupóstum hratt út. 

Meira af vínrauðum, minna af bleikum

Vínrauður minnir alltaf á haustið og mun liturinn gleðja alveg til jóla. Allar flíkur eru flottar í vínrauðum lit og líka fylgihlutir. 

Meira af látlausum strigaskóm, minna af þeim ljótu

Hátískuhúsið Balenciaga gaf „ljótu strigaskónum“ byr undir báða vængi fyrir nokkrum árum og hafa þeir verið gríðarlega áberandi síðan. Nú er hins vegar komið að stílhreinu strigaskónum en þá má frá merkjum eins og Adidas, Veja og Golden Goose. 

Meira af rúskinni, minna af leðri

Þó að leðrið sé alltaf klassískt og blaðamaður eigi erfitt með að hvíla það þá er rúskinnið mun meira áberandi núna. Nýtum dagana vel þegar ekki rignir og klæðumst því í brúnu.

Meira af loðnu, minna af minímalisma

Stórir loðnir jakkar voru áberandi á tískupöllunum fyrir veturinn hjá merkjum eins og Erdem og Helmut Lang. Það skiptir ekki máli hvaða litur það er, svo lengi sem það er mjúkt gerviloð eða litríkar fjaðrir, þá gengur það upp. 

Meira af mittisbeltum, minna af sniðleysi

Leggðu áherslu á mittið og settu belti yfir peysur, jakka og kjóla. 

Meira af náttúrulegum nöglum, út með löngu og oddhvössu

Langar, oddhvassar og skreyttar neglur hafa verið mjög áberandi en nú mega þær víkja fyrir náttúrulegri lengd. Fyrst að veturinn nálgast er líka kjörið að leika sér með dekkri liti eins og brúnan og vínrauðan.

Meira af augnkremi, minna af sólarvörn

Líklegt er að við þurfum að fara að skipta sólarvörninni út fyrir augnkremið á þessum árstíma. Það er sniðugt að bregða á það ráð að geyma kremið í ísskáp svo það sé einstaklega kalt og ferskt þegar þú berð það á þig.

Meira af orkunni, minna af krúttinu

Stundum þarf að klæða sig í vel sniðinn jakka með smá axlapúðum til að ná sínu fram. Veldu dökka og náttúrulega liti því þannig jakka notarðu um ókomna tíð.