Íslenska útivistarmerkið 66°Norður hefur nú í samstarfi við fatahönnuðinn Charlie Constantinou unnið að nýrri vörulínu eftir vel heppnað samstarf á síðasta ári. Charlie hefur á stuttum tíma skapað sér stórt nafn innan tískuheimsins fyrir sérstaka áherslu á tækniefni og litunarferla. Hann er útskrifaður úr einum virtasta listaháskóla í heimi, Central Saint Martins.

Nýja vörulínan endurspeglar það og er afraksturinn útivistarfatnaður sem nýtist við krefjandi aðstæður.

Frétt af mbl.is

„Mitt verkefni er að skapa klæðnað með notagildi“

Samstarfið hefur vakið mikla athygli erlendis og rataði meðal annars í eina virtustu hönnunarbúð heims, Dover Street Market í Lundúnum. Það þykir eftirsóknarvert að selja merkið sitt í þeirri verslun. 

„Eitt markmiðanna með samstarfinu með Charlie var að komast inn í búðir sem 66°Norður hefur ekki verið í áður. Dover Street Market var efst á lista,“ segir Bergur Guðnason fatahönnuður hjá 66°Norður.

Bergur Guðnason og Charlie Constantinou við hönnun línunnar.

Föt framleidd úr tæknilegum afgangsefnum

Bergur segir frá því að samstarfið hafi gengið vonum framar. „Við Charlie fengum algjörlega frjálsar hendur í hönnunarferlinu sem endurspeglast í lokaútkomu línunnar. Einnig tókum við þátt í öllu sem við kom myndheim, markaðsmálum og hvernig varan lítur út á búðargólfinu.“