Heilu hverf­in, heim­ili fólks, fyr­ir­tæki og sögu­fræg­ar stofn­an­ir hafa orðið gróðureld­un­um sem geisað hafa und­an­farið í Los Ang­eles að bráð. Um­fang tjóns­ins er ekki orðið aug­ljóst núna en verður skýr­ara eft­ir því sem dag­arn­ir líða.

Ea­mes-húsið er eitt fræg­asta kenni­leiti í arki­tekt­úr í Los Ang­eles og þótti tæpt standa fyr­ir nokkr­um dög­um hvort að húsið myndi standa eft­ir. Húsið er staðsett í Palisa­des-hverf­inu en sá eld­ur hef­ur verið sá stærsti og hef­ur brennt meira en 23.000 hekt­ara. Húsið þykir vera mik­ill gim­steinn og stór hluti af menn­ing­ar­sögu borg­ar­inn­ar. 

Framtíð húss­ins var óljós um tíma og fór starfs­fólk í að fjar­lægja ein­hver hús­gögn og muni úr hús­inu áður en þurfti að rýma svæðið. 

Staðsett í Palisa­des-hverf­inu

Ea­mes-húsið er þekkt kenni­leiti og er staðsett í Palisa­des-hverf­inu í Los Ang­eles. Það var hannað og byggt árið 1949 af hjón­un­um Char­les og Ray Ea­mes. Ea­mes-hjón­in störfuðu á sjötta og sjö­unda ára­tug ald­ar­inn­ar á tím­um mód­ern­ism­ans.

Hönn­un hjón­anna er tíma­laus og er hönn­un þeirra klass­ísk enn þann dag í dag. Húsið var heim­ili þeirra og vinnu­stofa. Hjón­in bjuggu í hús­inu til dauðadags. Char­les lést þann 21. ág­úst árið 1979 og Ray lést á sama degi tíu árum síðar.