Fyrirliði Stjörnunnar náði stórum áfanga í sjöundu umferð Bestu deildar kvenna og tveir leikmenn skoruðu sína fyrstu þrennu í deildinni.
Anna María Baldursdóttir lék sinn 200. leik í deildinni þegar Stjarnan tapaði fyrir Val á Hlíðarenda, 4:0. Allir leikir hennar eru fyrir Garðabæjarliðið en Anna hefur leikið með meistaraflokki Stjörnunnar frá árinu 2010 þegar hún kom 15 ára gömul inn í liðið.
Anna er aðeins 20. leikmaðurinn í sögu efstu deildar kvenna sem nær að spila 200 leiki. Hún er sú fjórða sem nær því fyrir Stjörnuna, en ekkert annað félag á fjóra leikmenn með 200 leiki. Ásgerður S. Baldursdóttir lék 218 leiki fyrir Stjörnuna, Auður Skúladóttir 211 og Harpa Þorsteinsdóttir 205.
Kristrún Rut Antonsdóttir skoraði sína fyrstu þrennu í deildinni þegar Þróttur vann Tindastól, 4:2, í Laugardalnum. Kristrún hefur þar með skorað fjögur af sjö mörkum Þróttar í deildinni en fyrir tímabilið hafði hún aðeins skorað fimm mörk í 89 leikjum í deildinni, öll fyrir Selfoss.
Kristrún er þriðji Þróttarinn sem skorar þrennu í efstu deild kvenna en Ólöf Sigríður Kristinsdóttir var með þá fyrstu árið 2020 og Katla Tryggvadóttir þá næstu árið 2022.
Ísabella Sara Tryggvadóttir, sem er aðeins 17 ára gömul, skoraði líka sína fyrstu þrennu í deildinni þegar Valur vann Stjörnuna 4:0. Þess má geta að faðir hennar, Tryggvi Guðmundsson, skoraði sjö þrennur í efstu deild karla og móðir hennar, Hrafnhildur Gunnlaugsdóttir, skoraði eina þrennu fyrir KR í efstu deild kvenna árið 1993.
Sigurbjörg Diljá Gunnarsdóttir, sem er 16 ára, skoraði sitt fyrsta mark í efstu deild þegar hún tryggði Keflavík sigur á Víkingi, 1:0. Hún skaut þar með Keflvíkingum upp fyrir lið föður síns á stigatöflunni en Gunnar Magnús Jónsson, faðir Sigurbjargar, þjálfar Fylki.
Úrslitin í 7. umferð:
Valur - Stjarnan 4:0
Fylkir - FH 0:3
Víkingur R. - Keflavík 0:1
Þróttur R. - Tindastóll 4:2
Þór/KA - Breiðablik 0:3
Markahæstar:
10 Sandra María Jessen, Þór/KA
7 Vigdís Lilja Kristjánsdóttir, Breiðabliki
6 Agla María Albertsdóttir, Breiðabliki
4 Amanda Andradóttir, Val
4 Andrea Rut Bjarnadóttir, Breiðabliki
4 Eva Rut Ásþórsdóttir, Fylki
4 Ísabella Sara Tryggvadóttir, Val
4 Kristrún Rut Antonsdóttir, Þrótti
4 Snædís María Jörundsdóttir, FH
3 Birta Georgsdóttir, Breiðabliki
3 Fanndís Friðriksdóttir, Val
3 Guðrún Elísabet Björgvinsdóttir, Val
3 Hafdís Bára Höskuldsdóttir, Víkingi
3 Hannah Sharts, Stjörnunni
3 Jasmín Erla Ingadóttir, Val
3 Jordyn Rhodes, Tindastóli
3 Sigdís Eva Bárðardóttir, Víkingi
Næstu leikir:
15.6. FH - Keflavík
15.6. Stjarnan - Þór/KA
16.6. Breiðablik - Þróttur R.
16.6. Fylkir - Valur
16.6. Tindastóll - Víkingur R.