FH-ingur náði stórum leikjaáfanga í 10. umferð Bestu deildar karla í fótbolta og Valur og Víkingur náðu bæði áföngum í mörgum og stigum í stórleik liðanna á Hlíðarenda.
Serbneski miðvörðurinn Dusan Brkovic lék sinn 400. deildaleik á ferlinum þegar lið hans, FH, mátti sætta sig við ósigur gegn Stjörnunni í Garðabæ, 4:2. Dusan lék þar sinn 71. leik í efstu deild hér á landi, sjötta leikinn með FH og hafði áður spilað 65 leiki með KA í deildinni.
Áður en Dusan kom til Íslands fyrir tímabilið 2021 hafði hann leikið samtals 329 deildaleiki í Serbíu, Ísrael, Ungverjalandi og Lettlandi. Þar af 134 leiki í Serbíu, 157 í Ungverjalandi, 30 í Ísrael og 8 í Lettlandi.
Andri Rafn Yeoman úr Breiðabliki jafnaði í gærkvöld við Hauk Pál Sigurðsson, sem lengst lék með Val, í áttunda sæti yfir leikjahæstu leikmenn sögunnar í efstu deild karla. Þeir deila nú 8. sætinu með 283 leiki hvor en Andri hefur leikið alla sína leiki fyrir Breiðablik og Haukur er leikjahæstur í sögu Vals með 248 leiki fyrir félagið.
Gylfi Þór Sigurðsson skoraði áfangamark í sögu Vals þegar hann jafnaði í annað sinn úr vítaspyrnu gegn Víkingi í uppbótartímanum á Hlíðarenda í fyrrakvöld, 2:2. Þetta var mark númer 2.200 hjá Val í efstu deild og aðeins KR-ingar hafa skorað fleiri mörk í deildinni, 2.253 talsins. Skagamenn eru þriðju með 1.852 mörk.
Víkingar náðu líka áfanga á Hlíðarenda en leikurinn gegn Val var 800. leikur félagsins í efstu deild.
Þorsteinn Aron Antonsson skoraði sitt fyrsta mark í efstu deild þegar hann tryggði HK sigur á Fram, 2:1, með hjólhestaspyrnu.
Elmar Atli Garðarsson, fyrirliði Vestra, skoraði sitt fyrsta mark í deildinni þegar hann kom liðinu yfir í ósigrinum gegn Fylki í Árbænum, 3:2.
Marko Vardic skoraði líka sitt fyrsta mark í deildinni þegar hann gerði síðara mark Skagamanna í sigrinum á KR, 2:1.
Úrslitin í 10. umferð:
Fylkir - Vestri 3:2
Fram - HK 1:2
Stjarnan - FH 4:2
ÍA - KR 2:1
Valur - Víkingur R. 2:2
Breiðablik - KA 2:1
Markahæstir í deildinni:
8 Patrick Pedersen, Val
8 Viktor Jónsson, ÍA
5 Benoný Breki Andrésson, KR
5 Danijel Dejan Djuric, Víkingi R.
5 Emil Atlason, Stjörnunni
5 Gylfi Þór Sigurðsson, Val
5 Jason Daði Svanþórsson, Breiðabliki
4 Ari Sigurpálsson, Víkingi R.
4 Aron Elís Þrándarson, Víkingi R.
4 Atli Sigurjónsson, KR
4 Björn Daníel Sverrisson, FH
4 Guðmundur Magnússon, Fram
4 Helgi Guðjónsson, Fram
4 Jónatan Ingi Jónsson, Val
4 Sigurður Bjartur Hallsson, FH
4 Tryggvi Hrafn Haraldsson, Val
4 Úlfur Ágúst Björnsson, FH
4 Viktor Karl Einarsson, Breiðabliki
Næstu leikir:
22.6. Vestri - Valur
22.6. HK - Stjarnan
22.6. Víkingur R. - KR
23.6. KA - Fram
23.6. Breiðablik - ÍA
23.6. FH - Fylkir