Guðmundur Baldvin Nökkvason, miðjumaður Stjörnunnar, leikur ekki fyrr en í byrjun ágúst í fyrsta lagi eftir að hann viðbeinsbrotnaði í leik Stjörnunnar gegn FH á dögunum.
Guðmundur skoraði fyrsta mark Stjörnunnar í sigri liðsins á FH á þriðjudag en þurfti að fara meiddur af velli um miðjan síðari hálfleik eftir harkalegt brot Björns Daníels Sverrissonar en Björn fékk gult spjald fyrir brotið.
Jökull Elísabetarson, þjálfari Stjörnunnar, staðfesti í samtali við fótbolti.net að Guðmundur væri viðbeinsbrotinn og yrði frá keppni í sex vikur hið minnsta.
Guðmundur Baldvin er í láni hjá Stjörnunni frá Mjällby í Svíþjóð en hann hefur leikið alla leiki Stjörnunnar á tímabilinu og skorað þrjú mörk. Stjarnan situr í fimmta sæti deildarinnar með jafnmörg stig og ÍA en verri markatölu.