Valsmaðurinn Patrick Pedersen, FH-ingurinn Ástbjörn Þórðarson og KA-maðurinn Hallgrímur Mar Steingrímsson náðu stórum áföngum á ferlinum í 12. umferð Bestu deildar karla í fótbolta.
Patrick spilaði sinn 250. deildaleik á ferlinum þegar Valsmenn töpuðu 3:2 fyrir ÍA á Akranesi í gærkvöld. Þar af eru 175 leikir fyrir Val enda hefur danski framherjinn leikið stærstan hluta ferilsins hér á landi. Hann lék 34 leiki fyrir Viking í norsku úrvalsdeildinni, 26 fyrir Vendsyssel í dönsku B-deildinni og 15 fyrir Sheriff Tiraspol í moldóvsku A-deildinni.
Ástbjörn lék sinn 100. leik í efstu deild þegar hann skoraði sigurmark FH gegn Breiðabliki í gærkvöld, 1:0. Leikina hefur hann spilað fyrir fjögur félög, 53 þeirra fyrir FH, 22 fyrir Keflavík, 14 fyrir Gróttu og 11 fyrir uppeldisfélagið KR.
Hallgrímur Mar skoraði sitt 60. mark í efstu deild þegar hann gerði seinna mark KA í sigrinum á HK í gær, 2:1. Þar af eru 56 mörk fyrir KA og hann bætir stöðugt félagsmet sitt fyrir Akureyrarfélagið. Hallgrímur er líka leikjahæsti leikmaður KA í deildinni með 168 leiki.
Hann er 36. leikmaðurinn í sögu efstu deildar sem nær að skora 60 mörk en af þeim leika aðeins tveir aðrir í deildinni í ár. Það eru Patrick Pedersen sem hefur skorað 108 mörk og er í fjórða sæti og Hilmar Árni Halldórsson sem hefur skorað 68 mörk og er í 22. sæti.
Þá er Helgi Guðjónsson orðinn þriðji markahæstur í sögu Víkings í efstu deild, jafn Erlingi Agnarssyni, eftir að hafa skorað tvö marka liðsins í stórsigri á Stjörnunni, 4:0. Helgi og Erlingur hafa skorað 26 mörk hvor en markahæstir eru Nikolaj Hansen með 48 mörk og Heimir Karlsson með 37 mörk. Helgi fór fram úr bæði Lárusi Guðmundssyni og Atla Einarssyni sem skoruðu 25 mörk hvor fyrir Víking á síðustu öld.
Úrslitin í 11. umferð:
Vestri - Fram 1:3
Stjarnan - Víkingur R. 0:4
KR - Fylkir 2:2
HK - KA 1:2
FH - Breiðablik 1:0
ÍA - Valur 3:2
Markahæstir í deildinni:
9 Patrick Pedersen, Val
8 Viktor Jónsson, ÍA
7 Emil Atlason, Stjörnunni
7 Jónatan Ingi Jónsson, Val
6 Helgi Guðjónsson, Víkingi R.
5 Arnþór Ari Atlason, HK
5 Benoný Breki Andrésson, KR
5 Danijel Dejan Djuric, Víkingi R.
5 Gylfi Þór Sigurðsson, Val
5 Jason Daði Svanþórsson, Breiðabliki
5 Sigurður Bjartur Hallsson, FH
5 Tryggvi Hrafn Haraldsson, Val
4 Ari Sigurpálsson, Víkingi R.
4 Aron Elís Þrándarson, Víkingi R.
4 Atli Sigurjónsson, KR
4 Björn Daníel Sverrisson, FH
4 Daníel Hafsteinsson, KA
4 Guðmundur Magnússon, Fram
4 Úlfur Ágúst Björnsson, FH
4 Viktor Karl Einarsson, Breiðabliki
Næstu leikir:
30.6. Víkingur - Fram
6.7. Vestri - Breiðablik
6.7. KR - Stjarnan
6.7. ÍA - HK
6.7. Valur - Fylkir
8.7. FH - KA