Bjarni verður þjálfari Fylkis

Markvörðurinn fyrrverandi Bjarni Þórður Halldórsson er að taka við sem þjálfari kvennaliðs Fylkis í fótbolta. Hann tekur við af Gunnari Magnúsi Jónssyni, sem hefur verið þjálfari liðsins undanfarin tvö ár.

Fótbolti.net greinir frá. Bjarki þekkir Fylkisliðið vel, því hann var markvarðaþjálfari liðsins í stjóratíð Gunnars.

Fylkir fór upp í Bestu deildina á fyrsta tímabili Gunnars á síðasta ári, en hafnaði í neðsta sæti í ár og féll aftur niður í 1. deild. 

Bjarni Þórður er uppalinn hjá Fylki og var aðalmarkvörður liðsins í efstu deild árin 2004 og 2005. Hann lék einnig með Víkingi úr Reykjavík og Stjörnunni í deild þeirra bestu.

Hann sneri svo aftur í Fylki árið 2011 og lék nær alla leiki liðsins í efstu deild á árunum 2012 til 2014.

• Blogga um frétt