Stjórn Blindrafélagsins hefur veitt Knattspyrnusambandi Íslands viðurkenninguna Samfélagslampann 2024 fyrir að hafa tekið upp svokallaðar sjónlýsingar fyrir blinda og sjónskerta frá landsleikjum.
Með þessum lýsingum sem hafa verið í höndum íþróttafréttamanna hafa blindir og sjónskertir fengið beina lýsingu á atvikum leiksins í gengum sérstakt app sem er sniðið að þeirra þörfum.
Viðureign Íslands og Slóvakíu á Laugardalsvellinum á 17. júní 2023 var fyrsti leikurinn með sjónlýsingu og slíkar lýsingar hafa síðan verið fastir liðir á landsleikjum á Laugardalsvelli. Næst verður leik Íslands og Wales í Þjóðadeild karla á föstudagskvöldið lýst á þennan hátt.
Fyrir þann leik mun Sigþór U. Hallfreðsson, formaður Blindrafélagsins, afhenda Þorvaldi Örlygssyni, formanni KSÍ, Samfélagslampann 2024 en nánar er greint frá þessu á vef KSÍ.