Norski miðilinn Nettavisen fjallar um leik Íslands og Tyrklands í Þjóðadeild karla í fótbolta sem fram fór á Laugardalsvelli í gærkvöldi.
Í grein miðilsins er fjallað um furðulegt atvik sem gerðist snemma í seinni hálfleik er Hakan Calhanoglu skoraði úr víti eftir að Sverrir Ingi Ingason handlék knöttinn innan teigs.
Tyrkneski miðjumaðurinn rann í skotinu og snerti boltann tvisvar áður en hann fór í netið, en slíkt má ekki. Ísland fékk því aukaspyrnu í eigin vítateig.
Kom atvikið ekki að sök fyrir Tyrkland, sem vann leikinn 4:2. Skoraði Calhanoglu löglega úr víti síðar í hálfleiknum.