Gamla ljósmyndin: Fær sér sæti
Setja bókamerki
/frimg/1/56/59/1565905.jpg)
Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.
Engu líkara er en að Hermann Hreiðarsson fái sér sæti á andliti sænsk andstæðings á þessari frábæru mynd Ásdísar Ásgeirsdóttur frá árinu 2000.
Ísland og Svíþjóð mættust þá í vináttulandsleik í knattspyrnu á Laugardalsvellinum hinn 16. ágúst og höfðu Íslendingar betur 2:1. Var það fyrsti sigurinn á Svíum í A-landsleik karla í heil 49 ár. Fara þurfti aftur til leiksins fræga 1951 þegar Ríkharður Jónsson afgreiddi Svíana með fjórum mörkum í 4:3 sigri á Melavellinum eins og komið hefur verið inn á í Gömlu ljósmyndinni.
Barnabarn Ríkharðs, Ríkharður Daðason skoraði fyrir Ísland í leiknum fyrir tuttugu og fjórum árum en Helgi Sigurðsson skoraði einnig fyrir Ísland sem þá lék undir stjórn Atla Eðvaldssonar.
Á myndinni tekst Hermanni að ná skalla að marki Svía í fyrri hálfleik en á myndinni eru einnig Íslendingarnir Eyjólfur Sverrisson og Ríkharður en þessir þrír voru gjarnan aðgangsharðir í föstum leikatriðum á þessum árum. Sá sem verður fyrir Hermanni er líklega Daniel Andersson og fyrir aftan virðist vera Teddy Lucic. Báðir léku þeir í efstu deild á Ítalíu á þessum tíma og í markinu er Magnus Hedman.
Hermann er uppalinn í Eyjum og vakti fyrst athygli með ÍBV. Er það eina liðið sem hann hefur spilað með hér heima. Hann á að baki langan feril á Englandi með Crystal Palace, Brentford, Wimbledon, Ipswich, Charlton, Portsmouth og Coventry. Hermann lék alls 322 leiki í ensku úrvalsdeildinni, fleiri en nokkur annar Íslendingur og yfir 500 deildaleiki á ferlinum. Lék hann 89 A-landsleiki og skoraði 5 mörk.
Hermann er eini Íslendingurinn sem orðið hefur enskur bikarmeistari í knattspyrnu en hann var í liði Portsmouth sem varð bikarmeistari árið 2008 og spilaði allan tímann í úrslitaleiknum á Wembley.
Hermann var fimm sinnum á meðal tíu efstu í kjöri Samtaka íþróttafréttamanna á íþróttamanni ársins: 2000, 2003, 2004, 2005 og 2008.
Ekki í lífshættu eftir stunguárás
Fagna því að réttaróvissu sé eytt
Árásarmannsins leitað og einn fluttur á sjúkrahús
Einn er látinn eftir eldinn á Hjarðarhaga
Vilja samtal við stjórnvöld
Taldi ærumeiðingar felast í ákúrum
100 milljóna svik koma ekki á óvart
„Í grunninn erum við bara litlir hræddir strákar í fangelsi“