„Þetta tímabil leggst prýðilega í okkur,“ sagði Höskuldur Gunnlaugsson, fyrirliði knattspyrnuliðs Breiðabliks, í samtali við mbl.is um komandi Íslandsmót sem hefst á laugardag með leik Breiðabliks og nýliða Aftureldingar á Kópavogsvelli.

„Það er tilhlökkun, það er orðið sem fangar stemninguna hjá okkur um þessar mundir. Ég skynja hungur í mönnum og að þeir séu vel innstilltir fyrir vonandi skemmtilegt mót,“ bætti leikmaðurinn fjölhæfi við.

En er erfiðara að koma inn í tímabil sem ríkjandi meistari?

„Þú getur gert það erfiðara fyrir þig í kollinum. Það getur verið huglæg hindrun. Það hjálpar að búa að reynslu að hafa áður farið inn í tímabil sem Íslandsmeistari. Það er ekki oft sem lið vinna tvö ár í röð.

Það er engin tilviljun og við verðum að viðurkenna það fyrir sjálfum okkur að þetta verður drulluerfitt. Liðin mæta eflaust enn stemmdari í að reyna að sigra ríkjandi Íslandsmeistara. Við erum klárir í þá áskorun og drifnir áfram að ná áfanga sem gerist ekki oft,“ sagði Höskuldur.

Breiðablik hafnaði í 2. sæti í spá Morg­un­blaðsins sem birt var í miðviku­dags­blaðinu. Breiðablik mæt­ir nýliðum Aftureldingar í upphafsleik Bestu deildarinnar á laug­ar­dags­kvöldið klukk­an 19.15 á Kópavogsvelli.

Tengdar fréttir

Upphitun í Bestu deild karla

Gylfi greip Blika glóðvolga

• Mun skemmtilegra en undirbúningstímabil á Íslandi
• Eyjamenn æfðu á grasi
• Spenna hjá öllum bæjarbúum
• Komnir með nokkra sem eru ekki síðri

» Fleiri tengdar fréttir

• Blogga um frétt