Framherjinn fór úr axlarlið
Setja bókamerki
/frimg/1/56/14/1561476.jpg)
Landsliðskonan Sandra María Jessen er spennt fyrir komandi tímabili með Þór/KA í Bestu deildinni.
Nóg verður um að vera hjá Söndru Maríu en þegar mbl.is talaði við hana var hún nýkomin úr landsliðsverkefni með Íslandi.
Íslenska landsliðið verður á EM í Sviss í sumar en Sandra hefur verið í miklu hlutverki hjá landsliðinu í aðdraganda mótsins. Hún hefur því minna getað verið með Þór/KA á undirbúningstímabilinu.
„Þetta er sá tími ársins sem maður leggur mestu vinnu og undirbúning fyrir. Mörgum, mörgum vikum í að koma sér í gott stand og púsla þessu saman, bæði með landsliðinu og Þór/KA. Maður býður spenntur eftir að þetta byrji og síðan aðdragandanum að EM,“ sagði Sandra María.
Með góða tilfinningu fyrir þessu
Hvernig leggst tímabilið í ykkur?
„Rosalega vel. Auðvitað kemur maður inn í öll tímabil með miklar væntingar og sér fram á bætingar og framfarir í þróun á deildinni.
Ég er með góða tilfinningu núna, það eru svona aðeins öðruvísi áherslur hjá þjálfurum. Við höfum verið að leggja öðruvísi áherslur heldur en undanfarin tímabil og þær líta rosalega vel út. Mikill kostur er hvað við erum margar búnar að vera lengi saman í þessu, litar breytingar á milli ára. Ég held að það sé eitthvað sem muni skila sér inni á vellinum.“
Framherjinn úr axlarlið
Staðan á hópnum hjá Þór/KA er nokkuð góð en Sonja Björg Sigurðardóttir, sem hafði leikið vel í framherjastöðunni á undirbúningstímabilinu, fór úr axlarlið í verkefni með U19-ára landsliðinu og verður frá eitthvað inn í tímabilið.
„Staðan er nokkuð góð. Við komum vel frá vetrinum varðandi meiðsli og svona. Við erum eðlilega með eina tvær sem eru að glíma við meiðsli, eins og flest lið, en ekkert sem ætti að halda þeim lengi frá. Hópurinn er vel stemmdur og allar heldur betur klárar í tímabilið.
Sonja Björg, sú sem hefur verið að spila fremst hjá okkur á undirbúningstímabilinu og hefur staðið sig frábærlega lenti í því að fara úr axlarlið með U19-ára landsliðinu. Ung og efnileg stelpa sem hefur verið að koma til baka frá meiðslum. Nokkrar vikur þar en hún kemur fljótt til baka.
Síðan eru lítil meiðsli hér og þar, ekkert sem á að vera langt inn í tímabilið.“
Þór/KA hafnaði í fjórða sæti í fyrra en markmiðið er að gera enn betur í ár.
„Eins og ég segi fyrir hvert einasta ár þá er markmiðið að gera betur en í fyrra. Ná enn þá meira úr hópnum og klifra aðeins ofar í töflunni. Okkur finnst að við eigum að vera að berjast um meira en við höfum gert undanfarin ár en síðan má ekki gleyma því að það var ekki langt síðan við vorum að berjast um að halda okkur í deildinni, fyrsta tímabilið mitt.
Við erum að bæta okkur á milli ára og rosalega margar stelpur eru búnar að taka gott skref fram á við. Við sjáum fram fyrir okkur að vera í baráttunni við þær bestu á þessu tímabili og ætlum að standa okkur þar.“
Líka sterk félagslega
Lítið hefur verið um breytingar hjá Akureyrarliðinu á milli ára. Þó gengu Eva Rut Ásþórsdóttir úr Fylki og markvörðurinn Jessica Berlin frá Galway United á Írlandi til liðs við liðið. Sandra kom aðeins inn á þær.
„Eva kemur rosalega sterkt inn í þetta. Hún er gríðarlega hæfileikaríkur leikmaður sem kann svo sannarlega fótbolta. Hún passar ekki bara inn í liðið á vellinum heldur líka hversu sterk hún er félagslega.
Ég hef verið svo mikið með landsliðinu erlendis og hef ekki mikið náð að æfa með liðinu síðan markvörðurinn okkar kom. Hún lítur vel út og hefur sýnt það í leikjum að hún á eftir að hjálpa okkur í sumar, mjög gæðamikill leikmaður.“
Þór/KA hafnar í 4. sæti samkvæmt spá Morgunblaðsins og mbl.is sem birtist í blaðinu sl. fimmtudag. Þór/KA heimsækir Víking úr Reykjavík í Fossvoginn í fyrstu umferð Bestu deildarinnar á miðvikudaginn.
Dæmi um að íslensk ungmenni herji á jafnaldra sína
Breti hyggst synda hringinn í kringum Ísland
Börn allt niður í 10 ára fórnarlömb kynlífskúgunar
Embættið opnaði skjalageymsluna
„Þetta er búið að vera í tómu rugli“
Bænum gert að farga húsinu á kostnað eiganda
Skiptir sköpum í lausn rýmisvandans