Klár ef Steini vill hafa mig með

Gló­dís Perla Viggós­dótt­ir, fyr­irliði ís­lenska landsliðsins í knatt­spyrnu, reikn­ar með því að vera til­bú­in í slag­inn þegar Ísland leik­ur tvo síðustu leiki sína í Þjóðadeild­inni um næstu mánaðamót.

Gló­dís missti af lands­leikj­um Íslands gegn Nor­egi og Sviss í byrj­un apríl vegna meiðsla í hné sem hún hef­ur glímt við und­an­farna tvo mánuði en von­ast til að spila gegn Nor­egi í Þránd­heimi 30. maí og Frakklandi á heima­velli 3. júní í loka­leikj­um Þjóðadeild­ar­inn­ar. Mánuði síðar, 2. júlí, hef­ur Ísland keppni á EM í Sviss.

Frétt af mbl.is

Sagt að ég mætti ekki setja mér tak­mark

„Já, ég vona það. Ef Steini (Þor­steinn Hall­dórs­son landsliðsþjálf­ari) vill hafa mig með, þá verð ég alltaf klár. En ég þarf að passa upp á mig áfram, ég má ekki halda að þó ég hafi náð að spila einn heil­an leik sé ég orðin ósigrandi aft­ur – eins og mér leið áður en ég meidd­ist – en þetta geng­ur gríðarlega vel.

Staðan á mér akkúrat núna er mjög góð og ég sé ekk­ert því til fyr­ir­stöðu að ég geti verið með í þeim leikj­um,“ sagði Gló­dís við Morg­un­blaðið en hún lék á fimmtu­dag­inn var sinn fyrsta heila leik með Bayern München í frá því í mars, þegar Bayern varð þýsk­ur bikar­meist­ari með því að sigra Wer­der Bremen 4:2 í úr­slita­leik í Köln.

Ítar­legt viðtal er við Gló­dísi í Morg­un­blaðinu í dag og það er einnig aðgengi­legt í app­inu Mogg­inn.