Þróttarar á toppnum með fullt hús

Þrótt­ur úr Vog­um er með fullt hús stiga á toppi 2. deild­ar karla í knatt­spyrnu eft­ir þriðju um­ferðina sem lauk í gær.

Þrótt­ar­ar lögðu Víðis­menn, 2:0, í Suður­nesja­slag í Garðinum á föstu­dags­kvöldið þar sem Rún­ar Ingi Ey­steins­son og Eyþór Orri Ómars­son skoruðu í síðari hálfleikn­um. Þrótt­ur er því með níu stig eft­ir fyrstu þrjá leik­ina og Auðun Helga­son fer vel af stað í end­ur­komu sinni sem þjálf­ari. Víðis­menn eru hins veg­ar aðeins með eitt stig.

KFA og Vík­ing­ur frá Ólafs­vík skildu jöfn á Reyðarf­irði, 1:1, og eru áfram tap­laus, KFA með 7 stig og Óls­ar­ar með 5. Marteinn Már Sverris­son kom KFA yfir strax á 2. mín­útu en Kwame Quee jafnaði fyr­ir Vík­inga aðeins fimm mín­út­um síðar og þar við sat.

Grótta vann sinn fyrsta leik í gær, 2:1 gegn Kára í Akra­nes­höll­inni. Máni Berg Ell­erts­son kom Kára yfir en Björg­vin Brimi Andrés­son og Ca­den McLag­an svöruðu fyr­ir Gróttu. Þar með er Grótta með 4 stig en Kári með 3 stig.

Dal­vík/​Reyn­ir fór illa með Hött/​Hug­in, 4:0, á Dal­vík. Sindri Sig­urðar­son, Áki Sölva­son og Martim Car­doso skoruðu í fyrri hálfleik og Remi Marie Emer­iau inn­siglaði sig­ur heima­manna í upp­bót­ar­tíma. Dal­vík/​Reyn­ir er með 4 stig en Hött­ur/​Hug­inn aðeins eitt.

Hauk­ar fóru í stutta ferð yfir í Garðabæ og unnu þar KFG 4:1. Hauk­ur Darri Páls­son skoraði tvö mörk fyr­ir Hauka, Ei­rík­ur Örn Beck og Daði Snær Inga­son eitt hvor en Guðmund­ur Thor Inga­son svaraði fyr­ir KFG rétt fyr­ir leiks­lok. Hauk­ar eru með 7 stig í þriðja sæti en KFG er með eitt stig á botn­in­um.

Jor­d­an Aeyemo skoraði þrennu fyr­ir Ægi sem vann Kor­mák/​Hvöt, 3:1, í Þor­láks­höfn. Krist­inn Bjarni Andra­son skoraði mark Hún­vetn­inga. Ægir er með 4 stig og Kor­mák­ur/​Hvöt er með 3.

• Blogga um frétt