Fengum dauðafæri í hverri sókn á tímabili

Rún­ar Már Sig­ur­jóns­son, fyr­irliði ÍA, var ánægður með stór­sig­ur­inn á Íslands­meist­ur­um Breiðabliks, 4:1, í ní­undu um­ferð Bestu deild­ar­inn­ar í fót­bolta á Kópa­vogs­velli í dag.

ÍA er með þrjá sigra og sex töp eft­ir fyrstu níu leik­ina en liðið hafði tapað þrem­ur leikj­um í röð. Liðið er þó enn í botnsæti deild­ar­inn­ar í þess­ari gríðarlega jöfnu deild.

„Þetta var virki­lega verðskuldaður sig­ur. Það hef­ur verið stíg­andi í þessu hjá okk­ur og hélt áfram í dag. Við gerðum þá hluti sem við ætluðum okk­ur vel. Við hefðum átt að skora miklu fleiri mörk. 

Á tíma­bili í seinni hálfleik feng­um við dauðafæri í hverri ein­ustu sókn. Von­andi á fram­herj­inn okk­ar þessi mörk inni, sér­stak­lega í næsta leik á sunnu­dag­inn. 

Við spiluðum mjög vel og vor­um að finna öll svæðin. Allt sem við lögðum upp með var að ganga. Það var mikið sjálfs­traust í liðinu og menn létu bolt­ann ganga hratt á milli manna. Við vor­um í litl­um vand­ræðum með þá sem var ánægju­legt,“ sagði Rún­ar í sam­tali við mbl.is eft­ir leik en Skaga­menn hefðu hæg­lega getað skorað mun fleiri mörk.

Frétt af mbl.is

ÍA skellti Breiðabliki í Kópa­vogi

Sagði það við strák­ana

Skaga­menn áttu góðan leik gegn Vík­ingi í síðustu um­ferð en töpuðu, 2:1. Þeir breyttu aðeins leikplan­inu fyr­ir leik­inn í dag og það heppnaðist mjög vel.

„Vík­ing­ur og Breiðablik eru senni­lega tvö bestu liðin og spila nokkuð líkt en við breytt­um aðeins frá því sem við gerðum gegn Vík­ingi. Við viss­um að þetta yrði aðeins opn­ari leik­ur. Þeir eru aðeins bein­skeytt­ari á könt­un­um og við vit­um að með okk­ar sókn­ar­bakverði get­um við sótt hratt á þetta mikla svæði. 

Ég sagði við strák­ana í hringn­um fyr­ir leik að ef við nýt­um fær­in okk­ar þá vinn­um við, og það var raun­in.“

Fyrst verða menn að leggja inn vinn­una

Leik­menn og stuðnings­menn Breiðabliks urðu pirraðir eft­ir að ÍA komst í 2:0 og kom þriðja mark Skaga­manna beint eft­ir pirr­ing Blika. Má segja að smá hiti hafi borist í leik­inn.

„Hiti og ekki hiti. Menn voru bara að berj­ast. Eitt af því sem við lögðum upp með var að berj­ast. Ef þú mæt­ir hérna og ert ekki til­bú­inn að hlaupa, tækla og berj­ast þá eru þeir það góðir í fót­bolta að þeir spila í gegn­um þig og valta yfir þig. 

Við mætt­um með bar­átt­una og vit­um að við kunn­um fót­bolta. Fyrst verða menn að leggja inn vinn­una og síðan kem­ur hitt.“

ÍA fær ÍBV í heim­sókn í hörku­leik á sunnu­dag­inn en liðin fá aðeins tveggja daga hvíld fyr­ir leik­inn. 

„Full stutt í hann kannski. Eyja­menn eru bún­ir að vera flott­ir og unnu áðan, hörku­sig­ur hjá þeim. 

Það verður bar­áttu­leik­ur á grasi og við verðum til­bún­ir í það. Þetta er bara 50/​50 leik­ur eins og marg­ir leik­ir í þess­ari deild. Ef þú ert ekki reiðubú­inn þá tap­ar þú leikn­um,“ bætti Rún­ar Már við. 

• Blogga um frétt