„Við erum Íslendingar, þetta reddast“

Sverr­ir Páll Hjaltested var að von­um ánægður með tvö mörk og sig­ur á ÍA, 3:0, í tí­undu um­ferð Bestu deild­ar­inn­ar í knatt­spyrnu á Akra­nesi í kvöld. 

Sverr­ir skoraði annað og þriðja mark Eyja­manna sem eru nú komn­ir með 14 stig í sjötta sæti deild­ar­inn­ar.

„Til­finn­ing­in er mjög góð. Fyrst og fremst unn­um við leik­inn og héld­um hreinu. Síðan skoraði ég tvö mörk, held það sé ekki hægt að biðja um meira. 

Nú för­um við í smá frí og það er frá­bært að gera það með 3:0-sigri.

Þetta er þannig deild í ár að öll lið eru að vinna hvort annað og það er mjög mik­il­vægt að vera á tán­um í hverj­um ein­asta leik,“ sagði Sverr­ir Páll í sam­tali við mbl.is. 

Frétt af mbl.is

Eyja­menn fóru illa með ÍA á Akra­nesi

Við kunn­um fót­bolta

Eft­ir að lyk­il­menn­irn­ir Omar Sowe og Oli­ver Heiðars­son duttu út hef­ur ÍBV unnið báða leiki sína, fyrst 2:1 gegn FH í Eyj­um og síðan gegn ÍA í kvöld. 

„Við vit­um all­ir að það er mikið áfall fyr­ir okk­ur að missa Omar og Oli­ver en þetta eru allt fót­bolta­menn í okk­ar liði. Við kunn­um fót­bolta. 

Þetta er vesen en við leys­um úr því, við erum Íslend­ing­ar! Þetta redd­ast,“ sagði Sverr­ir á léttu nót­un­um. 

Sverr­ir var í minna hlut­verki í byrj­un tíma­bils­ins en hef­ur nýtt tæki­færið vel í fjar­veru Om­ars og Oli­vers.

„Auðvitað vil ég spila og maður er í þess­um fót­bolta til þess. Ég þarf að halda þessu áfram og verða enn betri. Þá end­ar þetta von­andi vel.“

Hélt að markvörður­inn myndi ná bolt­an­um

Fyrra mark Sverr­is var glæsi­legt en hann fékk bolt­ann frá Þor­láki Breka Þ. Baxter og smellti hon­um í netið frá nán­ast miðju.

„Ég segi við Breka að leggja bolt­ann fyr­ir mig því ég sé mark­mann­inn þeirra vera aðeins úr stöðu. Síðan þegar ég er bú­inn að sparka í bolt­ann hélt ég að hann myndi ná hon­um en síðan endaði þetta bara í net­inu og úr kom mark.“

Deild­in er af­skap­lega jöfn en nú eru Eyja­menn nær því að blanda sér í Evr­ópu­bar­áttu en að falla.

„Mark­miðið okk­ar er að fara í hvern leik og reyna að vinna hann. Ef við vinn­um flesta leiki þá end­um við í góðri stöðu,“ bætti Sverr­ir Páll við í sam­tali við mbl.is. 

• Blogga um frétt