Glódís: Allir að spyrja að þessu

Íslenska kvenna­landsliðið í knatt­spyrnu mátti þola 2:0-tap gegn Frakklandi í 3. riðli A-deild­ar Þjóðadeild­ar kvenna á Laug­ar­dals­velli í kvöld. Fyr­irliðinn Gló­dís Perla Viggós­dótt­ir mætti í viðtal við mbl.is eft­ir leik.

„Þetta var ekki okk­ar besta frammistaða svona heilt yfir. En að sama skapi vor­um við að spila á móti Frakklandi sem er með heimsklassa leik­menn og voru með leik­menn í dag sem vildu sanna sig fyr­ir EM.

Við slökkv­um á okk­ur í tvö skipti og þær skora en fyr­ir utan þessi mörk sköpuðu þær sér ekki neitt. Það er eitt­hvað sem við get­um tekið með okk­ur, það er að við erum sem lið að verj­ast vel stór­an hluta af leikn­um. Það má ekki ger­ast að við slökkv­um svona á okk­ur,“ sagði Gló­dís í sam­tali við mbl.is eft­ir leik.

Þið eigið góðan fyrri hálfleik í meðvind og fáið hörku­færi, þar á meðal þú þegar þú fylg­ir eft­ir auka­spyrnu Karólínu Leu. Var svekkj­andi að fara ekki með for­ystu inn í hálfleik­inn?

„Já, ekki spurn­ing af því að við fáum bæði það færi og annað færi stuttu seinna. Auðvitað verðum við að láta þetta detta með okk­ur til að ná í úr­slit og við höf­um ekki verið að ná því. Það er auðvitað svekkj­andi en það er ekk­ert sem við get­um gert í því nema að halda áfram að æfa okk­ur og gera okk­ar besta inni á vell­in­um.“

Það var hvasst á Laug­ar­dals­velli í kvöld en Gló­dís seg­ir að ým­is­legt hefði mátt fara bet­ur í leik liðsins í kvöld.

„Auðvitað var vind­ur­inn erfiður en við hefðum oft­ar getað haldið leng­ur í bolt­ann, bæði í fyrri og seinni hálfleik. Við hefðum líka getað skapað okk­ur betri færi. Í fyrri hálfleik hefðum við geta skapað enn þá fleiri föst leik­atriði af því að við viss­um að það væri eitt­hvað sem þeim myndi líða illa með og henta okk­ur vel,“ sagði Gló­dís.

Eng­inn sig­ur í Þjóðadeild­inni, finnst þér það vera áhyggju­efni fyr­ir EM í sum­ar?

„Nei, það eru all­ir að spyrja að þessu. Þetta er ekk­ert sem ég var búin að hugsa út í og er að pæla í. Við erum mest að pæla í frammistöðum okk­ar og heilt yfir í Þjóðadeild­inni þá hafa þær verið upp og niður.

Við erum samt að sýna að við erum að taka fram­förum og við erum að vinna í hlut­um sem okk­ur lang­ar að vera betri í. Við erum að ná því fram í leikj­um og við höf­um ekki verið að ná í úr­slit­in sam­hliða því, því miður. Við treyst­um á að þetta detti með okk­ur í leikj­un­um sem skipta virki­lega máli á EM, sagði Gló­dís að lok­um.

• Blogga um frétt