„Ég elska að vera hérna“

„Ég elska að vera hérna. Mér finnst íþróttamiðstöðin vera frá­bær, frá­bær aðstaða,“ sagði Dagný Brynj­ars­dótt­ir, reynslu­bolti í ís­lenska landsliðinu í knatt­spyrnu, eft­ir æf­ingu í steikj­andi hita í Stara Pazova í Serbíu í morg­un.

„Það er mjög ánægju­legt að geta bara labbað út á leik­vang og æf­inga­völl­inn. Ég var að koma frá Íslandi þar sem hef­ur rignt mikið und­an­farið.

Það er frek­ar heitt hérna en ég ætla ekki að kvarta yfir því. Það er sól­ríkt hérna og þetta gæti ekki verið betra,“ sagði Dagný í sam­tali við mbl.is.

Frétt af mbl.is

Fáum von­andi svona aðstöðu einn dag­inn

Æfðu strák­ar með okk­ur líka

Nokkuð er síðan tíma­bili Dag­nýj­ar með West Ham United lauk. Spurð hvernig hún hafi haldið sér í formi á meðan sagði Dagný:

„Tíma­bil­inu lauk um miðjan maí og okk­ur stóð til boða að æfa í tvær vik­ur til viðbót­ar. Ég þáði það og gat æft á æf­inga­svæði West Ham. Það var tölu­verður fjöldi leik­manna sem tók þátt í þeim æf­ing­um.

Þær æf­ing­ar í þess­ar tvær vik­ur voru því góðar áður en ég kom til móts við landsliðið fyr­ir leiki í Þjóðadeild­inni í lok maí. Svo fékk ég sex daga frí, æfði eft­ir það ein en svo vor­um við sex leik­menn sem æfðum sam­an.

Það voru leik­menn sem áttu það sam­eig­in­legt að tíma­bil­um þeirra var lokið. Það var mjög skemmti­legt, það æfðu strák­ar með okk­ur líka. Það var gott skref fram á við áður en við kom­um sam­an hérna.“

Í fyrsta skipti þrátt fyr­ir tap­leysi

Hún er á leið á sitt fjórða Evr­ópu­mót og er spennt fyr­ir því.

„Ég myndi segja að síðasta EM hafi verið von­brigði því við töpuðum ekki leik. Ég held að það hafi verið í fyrsta skipti sem lið komst ekki upp úr riðlin­um þrátt fyr­ir að vera tap­laust. Það var erfitt en þetta er fjórða Evr­ópu­mótið mitt.

Þetta er aðeins öðru­vísi því síðasta mót var aðeins fyr­ir þrem­ur árum þannig að manni finnst ekki vera svo langt síðan. Við erum með tölu­verðan fjölda leik­manna sem ég myndi segja að búi yfir mik­illi reynslu.

Það eru ekki mjög marg­ir leik­menn sem eru að fara á sitt fyrsta mót. Flest­ar okk­ar þekkja til­finn­ing­una eft­ir síðasta EM og við vilj­um forðast að upp­lifa þá til­finn­ingu aft­ur. Von­andi stönd­um við okk­ur bet­ur í ár og kom­umst upp úr riðlin­um,“ sagði Dagný að lok­um.

• Blogga um frétt