Steinþór Freyr Þor­steins­son knatt­spyrnumaður úr Völsungi á Húsa­vík náði þeim stóra áfanga í dag að leika sinn 400. deilda­leik á ferl­in­um.

Hann lék með Völsungi gegn ÍR í 1. deild­inni á Húsa­vík­ur­velli og varð þar með aðeins 45. ís­lenski knatt­spyrnumaður­inn frá upp­hafi sem nær þess­um leikja­fjölda í deilda­keppni, heima og er­lend­is.

Steinþór, sem fædd­ist árið 1985 og verður fer­tug­ur þann 29. júlí, hóf að leika með meist­ara­flokki Breiðabliks árið 2002, þá aðeins 16 ára gam­all, og lék með liðinu til 2008. Hann lék 39 úr­vals­deild­ar­leiki fyr­ir Breiðablik og 52 leiki í 1. deild.

Hann fór þá til nýliða Stjörn­unn­ar og lék þar í úr­vals­deild­inni 2009 og 2010, alls 26 leiki í deild­inni.

Steinþór Freyr í leik með Breiðabliki gegn KR. Ljós­mynd/​Ein­ar Freyr Jóns­son

Um mitt tíma­bilið 2010 fór Steinþór í at­vinnu­mennsku til Svíþjóðar og lék með Örgryte í B-deild­inni til loka tíma­bils­ins, níu leiki þar sem hann skoraði tvö mörk.

Steinþór Freyr Þor­steins­son í leik með Stjörn­unni gegn Fylki árið 2010. mbl.is/​Eggert Jó­hann­es­son

Þaðan fór hann til Nor­egs og lék þar í sex ár frá 2011 til 2016. Fjög­ur tíma­bil með Sand­nes Ulf, tvö þeirra í úr­vals­deild og tvö í B-deild, og tvö með Vik­ing frá Stavan­ger, 2014 og 2015, í úr­vals­deild­inni.

Steinþór Freyr í bún­ingi Örgryte í Svíþjóð. ois.se

Steinþór lék alls 155 deild­ar­leiki í Nor­egi, þar af 106 leiki í úr­vals­deild­inni, og skoraði 19 mörk.

Steinþór Freyr heiðraður sem leikmaður árs­ins hjá Sand­nes Ulf í Nor­egi. Ljós­mynd/​sand­nesulf.no

Hann flutti heim til Íslands í árs­byrj­un 2017 og þá til Ak­ur­eyr­ar en þar lék Steinþór með KA í úr­vals­deild­inni frá 2017 til 2023 og spilaði sam­tals 88 úr­vals­deild­ar­leiki fyr­ir fé­lagið.

Steinþór Freyr Þor­steins­son í bún­ingi Vik­ing í Stavan­ger árið 2013. Ljós­mynd/​Vik­ing-fk.no

Steinþór gekk til liðs við Völsung árið 2024 og tók þátt í að koma liðinu upp í 1. deild­ina, spilaði 20 af 22 leikj­um liðsins í 2. deild, og hann hef­ur nú leikið 11 leiki með Hús­vík­ing­un­um í 1. deild­inni á yf­ir­stand­andi keppn­is­tíma­bili.

Deilda­leik­irn­ir hans skipt­ast því þannig:

91 Breiðablik
26 Stjarn­an
  9 Örgryte
106 Sand­nes Ulf
49 Vik­ing
88 KA
31 Völsung­ur

Steinþór lék átta A-lands­leiki á ár­un­um 2009 til 2014, sjö vináttu­leiki og einn leik í undan­keppni EM, gegn Nor­egi árið 2011. Þá lék hann 13 leiki með yngri landsliðum Íslands og skoraði í þeim tvö mörk.

Steinþór Freyr Þor­steins­son eft­ir lands­leik gegn Andorra. mbl.is/​Eggert Jó­hann­es­son

Hann er fjórði ís­lenski leikmaður­inn sem nær þess­um áfanga á síðustu þrem­ur mánuðum en Guðmund­ur Þór­ar­ins­son lék sinn 400. deilda­leik í apríl og þeir Guðlaug­ur Victor Páls­son og Eggert Gunnþór Jóns­son náðu hon­um báðir í maí.

Frétt af mbl.is

Eggert náði stór­um áfanga

Lista yfir alla ís­lenska knatt­spyrnu­menn sem hafa náð 400 deilda­leikj­um á ferl­in­um til árs­loka 2024 má sjá í bók­inni Íslensk knatt­spyrna 2024, á bls. 293.

Einnig má sjá frétt­ir af 20 leik­mönn­um sem hafa náð þess­um áfanga frá ár­inu 2019 með því að skoða "Tengd­ar frétt­ir" sem fylgja þess­ari frétt.

Tengd­ar frétt­ir

400 leikja hóp­ur­inn

Eggert náði stór­um áfanga

• Guðlaug­ur Victor náði stór­um áfanga
• Guðmund­ur náði stór­um áfanga
• Tíma­móta­leik­ur hjá Jóni Daða
• Jó­hann náði stór­um áfanga

» Fleiri tengd­ar frétt­ir

• Blogga um frétt