Þýskaland í undanúrslitin
Setja bókamerki
Þýskaland er komið í undanúrslit Evrópumóts kvenna í knattspyrnu eftir sigur á Austurríki, 2:0, á Brentford-leikvanginum í London í kvöld.
Þýska liðið mætir Frakklandi eða Hollandi í undanúrslitum en þau lið eigast við á laugardagskvöldið.
Lina Magull kom Þýskalandi yfir á 26. mínútu eftir sendingu frá Klöru Bühl og staðan var 1:0 í hálfleik.
Upphafsmínútur síðari hálfleiks voru líflegar en Þýskaland átti stangarskot eftir 17 sekúndur og Austurríki sláarskot skömmu síðar. Þær austurrísku voru áfram hættulegar og áttu skot í stöng á 57. mínútu.
Spennan varði fram á lokamínútur en þegar rúmlega 89 mínútur voru liðnar skoraði Alexandra Popp og kom Þjóðverjum í 2:0. Þar með voru úrslitin ráðin.
