Robert Lewandowski, fyrirliði og markahæsti leikmaður í sögu pólska landsliðsins í knattspyrnu, er klár í slaginn og gæti byrjað mikilvægan leik liðsins gegn Austurríki í D-riðli Evrópumóts karla á morgun.
Lewandowski missti af fyrsta leik Póllands í riðlinum, 1:2-tapi fyrir Hollandi, eftir að hafa meiðst á læri í vináttuleik gegn Tyrklandi skömmu áður en Evrópumótið í Þýskalandi hófst.
The Guardian greinir hins vegar frá því að sóknarmaðurinn öflugi sé búinn að æfa með liðinu undanfarna daga og byrji að öllum líkindum í fremstu víglínu á morgun.
Leikur Póllands og Austurríkis hefst klukkan 16 á morgun og fer fram á Ólympíuleikvanginum í Berlín.