Georgía vann í kvöld frækinn 2:0- sigur á Portúgal í lokaumferð í riðlakeppni EM karla í fótbolta í Gelsenkirchen. Með sigrinum tryggði Georgía sér sæti í 16-liða úrslitum á sínu fyrsta lokamóti.
Georgíumenn byrjuðu með miklum látum og Khvicha Kvaratskhelia skoraði eftir tæplega tveggja mínútna leik er hann skoraði af öryggi eftir að hann slapp í gegn.
Portúgal reyndi hvað það gat til að jafna en án árangurs og var staðan í hálfleik 1:0. Hún varð svo 2:0 á 57. mínútu er Georges Mikautadze skoraði úr víti.
Portúgal skapaði sér nokkuð af færum eftir það en Giorgi Mamardashvili stóð vaktina gríðarlega vel í marki Georgíu og 2:0 urðu lokatölur. Eru bæði lið því komin áfram í 16-liða úrslit.
Í hinum leik riðilsins vann Tyrkland sigur á Tékklandi, 2:1, í Hamburg og tryggði sér sæti í 16-liða úrslitum. Tékkland er úr leik.
Antonín Barák fékk sitt annað gula spjald og þar með rautt á 20. mínútu og voru Tékkar því manni færri stóran hluta leiks.
Hakan Calhanoglu nýtti sér það á 51. mínútu er hann skoraði fyrsta mark leiksins fyrir Tyrkland.
Thomas Soucek jafnaði fyrir Tékkland á 66. mínútu en Cenk Tosun tryggði Tyrklandi sigur í uppbótartíma.
Georgía mætir Spáni í 16-liða úrslitum, Portúgal og Slóvenía mætast og Tyrkland mætir Austurríki.