Spánn er kominn í undanúrslit á Evrópumóti karla í knattspyrnu eftir 2:1 sigur á liði Þýskalands í framlengdum leik í Stuttgart í kvöld.
Sigurmarkið skoraði varamaðurinn Mikel Merino á 119. mínútu leiksins en þá skallaði hann boltann í netið eftir frábæra sendingu frá Dani Olmo. Spánn mætir Frakklandi eða Portúgal í undanúrslitum á þriðjudaginn.
Það var ekki mikið um færi í fyrri hálfleik en Kai Havertz fékk þó það besta á 35. mínútu leiksins en þá kom löng sending upp völlinn og Havertz var í góðu færi til að koma Þjóðverjum yfir en Unai Simon varði vel frá honum.
Í upphafi seinni hálfleiks náðu Spánverjar svo að komast yfir en á 51. mínútu skoraði Dani Olmo gott mark en hann fékk þá góða sendingu út í teiginn frá hinum 16 ára gamla Lamine Yamal og setti boltann smekklega í netið.
Eftir þetta tóku Þjóðverjar öll völd á vellinum og reyndu þeir sérstaklega að senda boltann fyrir mark Spánverja. Það virtist ekki ætla að ganga upp fyrir heimamenn að jafna metin en rétt fyrir lok venjulegs leiktíma eða á 89. mínútu jafnaði Florian Wirtz metin fyrir Þjóðverja.
Maximillian Mittelstadt átti þá sendingu fyrir markið sem Joshua Kimmich skallaði til baka út í teiginn og þar var Wirtz og setti boltann í stöngina og inn. Stuttu síðar var flautað til loka seinni hálfleiks og þar sem staðan var 1:1 þurfti að framlengja leikinn.
Í framlengingunni voru liðin fyrst og fremst að hugsa um það að gera ekki mistök. Bæði lið fengu vissulega færi til að skora en þegar allt stefni í vítaspyrnukeppni þá kom sigurmark frá Spánverjum.
Það voru liðnar 119 mínútur af leiknum þegar markið kom frá Mikel Merino. Þjóðverjar reyndu allt til að jafna metin og fór uppbótartíminn í seinni hálfleik í framlengingunni í sjö mínútur en það dugði ekki til og því voru það Spánverjar sem fögnuðu þegar flautað var til leiksloka.
Það kemur í ljós síðar í kvöld hvort það verður Portúgal eða Frakkland sem mætir Spánverjum í undanúrslitum á þriðjudagskvöldið.