Kingsley Coman íhugar að hætta að leika með franska landsliðinu í knattspyrnu, aðeins 28 ára gamall.
Coman spilaði einungis í 15 mínútur með franska liðinu á EM í Þýskalandi, sem varamaður gegn Hollandi, en liðið féll út í undanúrslitum gegn Spánverjum í gærkvöld.
L'Equipe segir í kvöld að þetta gætu hafa verið síðustu 15 mínútur Comans í franska landsliðsbúningnum. Hann hafi lagt mikið á sig til að byggja sig upp eftir meiðsli og komast í hópinn fyrir EM, en hann sé nú vonsvikinn eftir að hafa fengið mest lítið að spreyta sig.
Coman, sem leikur með Bayern München, hefur skorað átta mörk í 57 landsleikjum fyrir Frakkland.