Tveir leikmenn Liverpool sem voru á meiðslalistanum verða klárir í slaginn á morgun þegar toppliðið fær botnlið Sheffield United í heimsókn í ensku úrvalsdeildinni í knattspyrnu annað kvöld.
Miðjumaðurinn Curtis Jones hefur verið frá keppni vegna ökklameiðsla sem hann varð fyrir í sigri gegn Brentford í deildinni þann 17. febrúar síðastliðinn.
Jones hefur æft án vandkvæða að undanförnu og greindi Jürgen Klopp frá því á fréttamannafundi í gær að hann yrði með á morgun.
Sömu sögu er að segja af Andy Robertson sem meiddist á ökkla í landsleikjahlénu í síðustu viku og missti því af 2:1-sigri á Brighton & Hove Albion um síðustu helgi.
Klopp bætti því við að Wataru Endo væri tæpur fyrir leikinn annað kvöld en að vænta mætti þess að Alisson, Diogo Jota og Trent Alexander-Arnold myndu allir snúa aftur til æfinga að hluta í næstu viku.
Allir þrír hafa verið frá um skeið en færast nær endurkomu líkt og Stefan Bajcetic, sem hefur verið frá allt tímabilið vegna vaxtarverkja en hefur æfingar með aðalliðinu í næstu viku eftir að hafa að undanförnu æft með U21-árs liði Liverpool.
Loks minntist Klopp á að Joel Matip, sem sleit krossband í hné í byrjun desember, sé byrjaður að hlaupa en að of lítið sé eftir af tímabilinu ætli hann að eiga möguleika á því að spila aftur á því.