Chelsea mátti sætta sig við jafntefli gegn botnliði Sheffield United, 2:2, þegar liðin mættust í 31. umferð ensku úrvalsdeildarinnar í knattspyrnu karla í Sheffield í dag.
Chelsea er í níunda sæti með 44 stig og Sheffield United er áfram á botninum með 16 stig, níu stigum frá öruggu sæti.
Chelsea komst tvívegis yfir í leiknum en heimamenn jöfnuðu metin í bæði skiptin.
Thiago Silva braut ísinn með skallamarki á 11. mínútu eftir hornspyrnu frá Conor Gallagher.
Jayden Bogle jafnaði metin eftir rúmlega hálftíma leik með skoti úr þröngu færi sem Djordje Petrovic varði í netið.
Um miðjan síðari hálfleik kom Noni Madueke Chelsea yfir að nýju með þrumuskoti á mitt markið rétt innan vítateigs sem Ivo Grbic í marki Sheffield United færði sig frá; reiknaði eflaust með skoti í fjærhornið.
Á þriðju mínútu uppbótartíma jafnaði Oli McBurnie metin fyrir Sheffield þegar hann fékk skallasendingu inn fyrir frá Cameron Archer og kláraði vel.