Enska knattspyrnufélagið Aston Villa hefur tryggt sér góðan skilding í vasann eftir að hafa gengið frá sölu á miðjumanninum Moussa Diaby til Al Ittihad í Sádi-Arabíu fyrir 50 milljónir punda.
Hann er annar leikmaðurinn sem Villa selur fyrir þessa upphæð í sumar en Douglas Luiz fór til Juventus fyrir 50 milljónir punda.
Diaby er 25 ára gamall Frakki sem á 11 landsleiki að baki. Hann lék aðeins eitt tímabil með Villa en spilaði alla leiki liðsins í úrvalsdeildinni síðasta vetur, 38 talsins, og skoraði 6 mörk.
Villa keypti hann af Leverkusen í Þýskalandi fyrir ári síðan en þá hafði hann hafnað því að fara til Sádi-Arabíu fyrir svipaða upphæð.
Diaby lék með Leverkusen í fjögur ár en hafði áður verið í röðum París SG frá 14 ára aldri til tvítugs.
Unai Emery er búinn að stokka talsvert upp í hópnum hjá sér eftir að Aston Villa tryggði sér sæti í Meistaradeildinni með því að ná fjórða sæti ensku úrvalsdeildarinnar síðasta vetur. Þetta eru breytingarnar á hópnum í sumar:
Komnir:
22.7. Amadou Onana frá Everton
19.7. Jaden Philogene frá Hull
11.7. Cameron Archer frá Sheffield United
1.7. Ross Barkley frá Luton
30.6. Samuel Iling-Junior frá Juventus (Ítalíu)
30.6. Enzo Barranechea frá Juventus (Ítalíu) (var í láni hjá Frosinone)
30.6. Leander Dendoncker frá Napoli (Ítalíu) (úr láni)
28.6. Ian Maatsen frá Chelsea
23.6. Lewis Dobbin frá Everton
Farnir:
24.7. Moussa Diaby til Al Ittihad (Sádi-Arabíu)
19.7. Filip Marschall til Crewe (lán)
15.7. Seb Revan til Wrexham
14.7. Calum Chambers til Cardiff
11.7. Tommi O'Reilly til Shrewsbury (lán)
10.7. Philippe Coutinho til Vasco da Gama (Brasilíu) (lán, var í láni hjá Al-Duhail)
30.6. Douglas Luiz til Juventus (Ítalíu)
22.6. Tim Iroegbunam til Everton
15.5. Morgan Sanson til Nice (Frakklandi) (var í láni hjá Nice)